O xurado elixirá hoxe aos gañadores do concurso, no que participaron nenos de dez colexios
07 dic 2012 . Actualizado a las 07:00 h.Uns 200 nenos de terceiro e cuarto de primaria de dez centros escolares da Costa da Morte participaron na novena edición do concurso Contos de Nadal, organizado por La Voz de Galicia e Radio Voz. Os rapaces amosaron o seu talento literario e unha enorme imaxinación cun lote de historias nas que Papá Noel, na maioría dos casos, e en menor medida os Reis Magos, protagoniza gran parte das aventuras. Contos que levan ao Polo Norte e a países lonxanos, pero tamén a pequenas aldeas que non escapan da crise, historias con nenos malos e bos e árbores decoradas que amencen o día de Nadal rodeadas de agasallos e sorpresas para aqueles que se portan ben. Regalos como os que recibirán os gañadores, cuxos nomes daranse a coñecer mañá, trala reunión do xurado.
A decisión non será doada, xa que a calidade dos contos desta novena edición é moi elevada, igual que algúns debuxos que acompañan a moitas das historias.
Os estudantes do Gándara Sofán (Carballo), Vilarmide (Muxía), As Revoltas (Cabana), Labarta Pose (Baio), Bormoio (Agualada), Areal (Camariñas), Canosa-Rus (Coristanco), Eugenio López (Cee), Artai (Carballo) e As Forcadas (Corme) presentaron ao Contos de Nadal historias cheas de boas intencións que serán premiadas o vindeiro día 15. A entrega de premios desta edición desenvolverase ás doce do mediodía no salón de actos do Concello de Cee. Haberá agasallos para os autores dos tres mellores contos e diplomas para outros sete contos seleccionados.