Un recital infantil puxo o punto final a un mes de actos en Ponteceso
31 oct 2012 . Actualizado a las 07:00 h.Houbo discursos, aplausos e parabéns. Pero, sobre todo, moita poesía. Despois dun mes de actividades o Simposio Pondaliano puxo onte o punto final ás súas actividades sen renunciar ata o último minuto ao seu afán de promover a cultura galega e facela chegar a un público o máis amplo posible.
Houbo poesía xa pola mañá na inauguración do miradoiro de aves da ensenada da Insua; e tamén a houbo, claro está, nos versos de Pondal convertidos na letra do Himno galego cos que o presidente da Real Academia Galega, Xosé Luís Méndez Ferrín, charlou cun grupo de alumnos do instituto, así como nas obras dos primeiros poetas galegos que centraron a súa intervención posterior ante os participantes no corpo central do Simposio. Tampouco faltou a poesía na coidada posta en escena inspirada nos versos de Celso Emilio Ferreiro coa que a un grupo de nenos de entre oito e doce anos puxeron o broche de ouro final a esta iniciativa.
E sen ser poesía, tamén houbo palabras de agarimo cara a entidade pontecesá por parte da deputada provincial Zaira Rodríguez e do secretario xeral de Política Lingüística, Valentín García, quen non dubidou en destacar á Fundación Eduardo Pondal coma «un referente da riqueza cultural, literaria e lingüística de Galicia» polo labor «verdadeiramente encomiable» que realiza.