A Praza dos Libros volve á vila carballesa durante catro díasA Fundación López Abente de Muxía eloxia a Miro Villar

A feira literaria instalarse no xardín municipal do 25 ao 28


carballo / la voz

A Praza dos Libros volve ao xardín municipal de Carballo a vindeira semana. Do xoves ao domingo, catro intensos días de literatura e animación, xornadas cargadas de cultura aínda que este ano o Concello disporá dun presuposto menor (12.800 euros, 2.000 menos que o ano pasado), xa que, segundo explicou onte a concelleira de Cultura, Mar Eirís, non contan co apoio da Xunta. Non haberá cartos institucionais, pero si terán a axuda de Conservas Calvo. O seu conselleiro delegado, Luciano Calvo, destacou a capacidade dos organizadores de «facer tanto con tan pouco».

Non lle falta razón, porque durante catro días Carballo acollerá a presentación de dez novidades literarias e unha discográfica, numerosos espectáculos para os máis cativos e oito librarías ofrecerán os seus produtos en oito postos, que poderán visitarse a diario de 11.00 a 14.00 e de 17.30 a 21.30 horas, e que ofrecerán descontos do 10 % en todos os libros.

Xoves 25

A festa literaria de Carballo arrincará o vindeiro xoves e durante toda a mañá haberá contacontos ambulantes que animarán aos máis pequenos a gozar da lectura. A poeta carballesa Rosalía Fernández Rial será a pregoeira desta edición (13.00 horas) e pola tarde actuará para os nenos o contacontos Anxo Moure (18.30 horas). Ademais, Adela Figueroa e Carlos Callón presentarán os seus libros, Madeira de mulher (19.30) e Como defenderes os teus dereitos lingüísticos (20.30), respectivamente.

Venres 26

O venres tamén haberá espectáculos infantís (ás 12.30 e ás 18.30 horas) e Xosé Neiras Vilas visitará á feira para presentar o seu último libro, Penúltimo dietario (19.30), e asinar exemplares de todas as súas obras. Pola súa banda, Ignacio Silva, que vén de publicar Cara B, e Rosalía Fernández Rial, autora de Átonos, participarán nunha charla coloquio (20.30 horas), e a xornada concluirá cun espectáculo etnográfico da asociación Arume.

Sábado 27

O escritor Xan Fraga, acompañado polo exfutbolista internacional Manolete, presentará Luis Suárez. Fútbol de seda (12.30 horas) e Francisco Castro fará o propio con In vino veritas (20.30 horas). Para os nenos haberá un espectáculo de monicreques da compañía Viravolta (19.30).

Domingo 28

O último día da feira, os libros virán acompañados de pan, xa que todos aqueles que merquen un exemplar serán agasallados cun molete de Carballo. Jorge Mira falará sobre o seu libro, A ciencia no punto de Mira (12.30 horas) e o autor de Os Bolechas presentará A familia Caravana (19.30). Ademais, Miguel Sande firmará exemplares de A vida fóra (20.00) e os nenos gozarán dos contos de Raquel Queizás (18.30 horas). A Praza dos Libros rematará co concerto acústico de María Xosé Silvar e Tito Calviño, que darán a coñecer Admirando a condición, o novo disco do grupo carballés Ses. 

O poeta ceense Miro Villar estará hoxe en Muxía para presentar As crebas, o seu último libro, publicado por Espiral Maior e gañador do Premio de Poesía Concello de Carral. O acto, organizado pola Fundación Gonzalo López Abente, desenvolverase na praza do Cabo da Vila (se chove, no salón de actos) ás nove da noite, e xunto co autor estarán o presidente da fundación e alcalde de Muxía, Félix Porto; o escritor e vicepresidente da entidade, Xosé Henrique Rivadulla Corcón, e o poeta fisterrán Alexandre Nerium.

A Fundación López Abente considera a Miro Villar como «un autor imprescindible na literatura galega e ao que a Costa da Morte debe moito, xa que é autor de numerosos estudos e antoloxías de poetas da zona», entre eles Antón Zapata ou o propio Gonzalo López Abente. «Durante moitos anos -explica-, a única fonte á que se podía acudir para ter de primeira man os textos do autor foi esta publicación de Miro Villar».

En breve sairá á rúa a edición que o poeta ceense preparou dun traballo inédito de López Abente, Bretemada, que será publicada pola Editorial Alvarellos e a fundación, e prologada por Xosé Luís Méndez Ferrín.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

A Praza dos Libros volve á vila carballesa durante catro díasA Fundación López Abente de Muxía eloxia a Miro Villar