Cee celebrará a súa Feira do Libro do 11 ao 16 deste mes. Na Praza da Constitución estarán situadas as casetas, que permanecerán abertas pola mañá de once a dúas e pola tarde de seis a dez.
En paralelo aos expositores, no Museo Fernando Blanco da localidade presentaranse diversas obras. A primeira cita é cun libro de varios autores coordinado por Xosé María Lema Suárez, A Terra de Soneira no corazón da Costa da Morte, que se dará a coñecer o xoves 11 ás 13.45 horas. Ese mesmo día presentaranse ás 19.15 horas Lume de cobiza, de Miguel Anxo Fernández, e ás 20.15 El hombre que hablaba difícil, de César Brandariz.
O venres tocaralle a quenda, ás 12.15, a Mi lugar, mi pequeño sueño, de Luis Anguita Juega, quen asinará exemplares a aqueles que o desexen. Ás 13.15 chegarán tres libros editados polo Seminario de Estudos Comarcais e publicados pola Deputación de A Coruña. Trátase de títulos moi próximos aos municipios da zona: As romarías da Costa da Morte, de Manuel Vilar e Xan Fernández; Dicionario de escritores e escritoras da Costa da Morte, de Xosé María Rei; e O hórreo atlántico ou fisterrán. Cabazos e cabaceiras da Costa da Morte e Barbanza, de Xose Mª Lema e Carlos Fernández Concheiro. Para este día resérvanse outras dúas obras: ás 1915 horas, El campo de Bucéfalo, de José Manuel Otero Lastres, e ás 20.15, La radio de Rial, escrito por Javier García e cuxa presentación contará coa presenza do propio Luis Rial.
O sábado a partir das 12.15 horas asinará exemplares de La mancha negra o autor Manuel Sánchez Dalama. Ás 13.15 presentaranse O papaventos de Laura, de María Canosa, e A ciencia no punto de Mira, de Jorge Mira. A xornada rematará con Francisco Fernández Naval e o seu libro Bater de sombras, ás 20.15 horas.