A Praza dos Libros pecha as súas portas con outra xornada de feira en Carballo

La Voz

CARBALLO

26 ago 2007 . Actualizado a las 02:00 h.

Nestes tres días de Praza dos Libros pasou un pouco de todo polo xardín municipal de Carballo, dende os abarrote do xoves frío e venteado de mercado e da presentación dos libros de Xan Fraga e Xurxo Borrazás, ata a relaxada e soleada tarde de onte. Os organizadores están satisfeitos, porque, aínda que as visitas ás casetas foron moi espalladas, en todas as actividades paralelas houbo moito público. Os que máis participan, os nenos, que moitas veces tiran polos pais e que sempre acaban mercando algún exemplar.

Literatura para todas as idades, pero tamén camisetas moi galegas e mesmo bixutería feita no Sáhara forman parte da oferta da Praza dos Libros, que comezou un xoves de mercado e remata un domingo de feira. Para hoxe, de feito, agárdase moita afluencia. Un dos motivos para acudir é a iniciativa Un libro, un pan , que consiste en que todas as persoas que fagan unha compra serán agasalladas cun molete da marca Pan de Carballo.

O programa da última xornada inclúe, ademais, a presenza de Santiago Jaureguízar, que asinará exemplares das súas obras a partir das doce da mañá. E, como peche, ás nove e media, tan pronto como cerren os postos, o cantautor cubano Norge Batista ofrecerá un concerto na carpa.

Por este mesmo escenario desfilaron ao longo dos tres días pasados autores como Mercedes Queixas, pregoeira nesta edición da Praza dos Libros; Xosé Ramón Freixeiro Mato, Paco Souto, Xurxo Borrazás, Xan Fraga, Farruco Graña e Alberto Varela Ferreiro. Os catro últimos, todos eles carballeses, coincidiron onte pola mañá na presentación de Historia dunha lata e Lume!, os últimos títulos no mercado de Varela Ferreiro, que segue a apostar pola literatura infantil cunha mensaxe sempre relacionada co respecto ao medio. Foi un encontro pouco habitual, xa que Xurxo Borrazás vive en Vigo; Farruco Graña, en Ribadeo, e Alberto Varela Ferreiro, en Santiago.

Tamén para onte estaba prevista a presentación de Seavia é nome de parroquia . O seu autor, José Antonio Andrade, xa estivo presente na xornada inaugural, na que, ademais, a súa obra confirmouse como unha das máis demandadas polo público. Tamén está tendo moi boa acollida a reedición de Crónicas de Carballo I , que estaba esgotado, e o seu autor, Xan Fraga, asinou o venres preto de trinta exemplares, unha cifra moi semellante á que dedicou Xurxo Borrazás de Arte e Parte , un ensaio moi diferente ás súas anteriores obras, no que fai unha reflexión sobre a realidade galega.

A Praza dos Libros tamén é sinónimo de festa. Concertos como o da caboverdiana Nancy Vieira e espectáculos como o de Leo i Arremecághona contribuíron a prolongar as xornadas literarias ata ben entrada a noite.

En xeral, a feira chega á súa fin cun balance satisfactorio. Tanto por parte dos organizadores como dos autores convidados e mesmo dos libreiros, que seguen regresando ano tras ano.