Este mes celebran as súas festas as capitais de seis concellos


carballo | Agosto é o mes das festas por excelencia. As parroquias que homenaxean aos seus patronos nestas datas cóntanse por ducias, pero tamén é a época na que viven as súas semanas grandes as capitais de seis municipios da Costa da Morte.

A primeira foi Vimianzo, onde aínda dura a resaca dos tres días de actividades programados pola comisión, que se pecharon o domingo cunha gala na que actuaron, entre outros, artistas do renome de Alazán.

Cee tomará o relevo o vindeiro luns, cunha semana de actos entre os que destacan, dentro dun programa eminentemente musical, os concertos de Celtas Cortos e Los Suaves. Mentras na vila ceense están en plenas Festas da Xunqueira, na de A Laracha empezarán, o día 15, as de Santa María de Torás, patrona da capital municipal. Serán catro días de verbenas e de animación musical polas rúas, fundamentalmente. Ao mesmo tempo, Laxe renderá homenaxe a Santa María da Atalaia, que vivirá dous días grandes: o 15, unha das datas de maior concentración de visitantes na vila mariñeira, e o 17, no que se repetirá, como todos os anos dende fai xa varias décadas, o simulacro de naufraxio, unha particular homenaxe á Virxe do Carme.

A patrona dos mariñeiros tamén será a protagonista das Festas do Mar de Malpica, que serán as últimas do calendario de agosto con tres xornadas, do 24 ao 26, nas que non faltará a música nin a tradicional procesión ata as illas Sisargas.

Pero antes aínda se celebrarán as festas de Coristanco, que serán do 17 ao 19 deste mes con oficios relixiosos e verbenas coas orquestras Ciudad Cristal, Acirema e Niebla.

Outra das vilas da Costa da Morte que tamén elixe o mes de agosto para a diversión é a de Buño, onde, ademais, as verbenas e o concerto do grupo folk A Roda, coincidirán coa celebración da non menos tradicional Mostra da Olería.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

Este mes celebran as súas festas as capitais de seis concellos