Ribeira é o terceiro concello de Galicia con máis queixas na Liña do Galego

La Voz RIBEIRA / LA VOZ

RIBEIRA

CARMELA QUEIJEIRO

Os concellos de A Pobra e Carnota recibiron os parabéns da Mesa pola Normalización

18 abr 2022 . Actualizado a las 05:00 h.

Como cada ano, a Mesa pola Normalización Lingüística fixo público o balance da Liña do Galego, unha ferramenta posta en marcha pola institución no 2007 para atender consultas sobre dereitos lingüísticos, tramitar queixas cara ás institucións e empresas que os vulneran e trasladar os parabéns para as que dean pasos para garantir o uso do galego. Nos resultados do pasado exercicio cítase a varios concellos barbanceses, uns para ben e outros non tanto. Ribeira é un deles e aparece destacado nas estatísticas por ser o terceiro de Galicia con máis queixas recibidas.

Regístrate gratis y recibe cada mañana en tu correo las principales noticias del día

Segundo o último informe, a Liña do Galego tramitou o pasado ano 601 expedientes, dos que 55 foron consultas, 58 parabéns e 488 queixas. Destas últimas, o 65,57 % estaban dirixidas ás distintas Administracións Públicas, das que o 7 % tiñan como destinatario o Concello de Ribeira. Por diante deste con maior porcentaxe de protestas están A Coruña (16 %) e Vigo (9%).

Os éxitos

Barbanza tamén figura no informe da Liña do Galego por aspectos positivos e, neste sentido, aparecen sinalados no apartado de éxitos deste servizo os concellos de A Pobra e de Carnota.

No que respecta ao pobrense, rexistráronse queixas polo uso exclusivo do castelán nas publicacións de Instagram do departamento de Turismo das que se deu traslado ao goberno local, que realizou as xestións pertinentes para incluír o galego como lingua prioritaria. Do mesmo xeito, o Concello de Carnota modificou os carteis do parque infantil do Pindo, que estaban en castelán.