Xarás, en Ribeira

ISABEL SANTOS

RIBEIRA

29 ene 2022 . Actualizado a las 05:00 h.

Moitas son as persoas que diariamente visitan Xarás, en Ribeira, por ser un núcleo de empresas e servizos, pero tamén porque é un dos accesos ao monte de Santo Alberte, atalaia privilexiada de moi fermosas paisaxes, e asentamento da ermida homónima, moi frecuentada por adolescentes e veciños co gallo da romaría do mes de abril.

Trátase dun topónimo pouco habitual, pois só hai outro Xarás en Camariñas; pero si que pode ter o significado bastante recorrente de «pedregoso ou areoso». O noso Xarás está nunha das ladeiras do monte de Santo Alberto e hai unha antiga canteira, polo que está garantida esta morfoloxía. Daquela, estariamos ante o étimo latino sabulum, «area», que da sábrego e xabre, co significado de «terra areosa da descomposición do granito».

Outra orixe sería o nome do arbusto xara de etimoloxía árabe (sa´ra´ «matogueira»), pero non parece moi axeitada, malia que comparte o significado de «terreo areoso».

E por estas coincidencias das linguas, traio unha palabra do tupí: xará, que significa «tocaio». Mágoa que os xarás (tocaios) estean en América do Sur, tan lonxe!