Suma Ribeira fai fincapé na necesidade de dotar ás parroquias de servizos básicos
30 may 2021 . Actualizado a las 05:00 h.Estreouse na corporación municipal como voceiro dun novo partido, Suma Ribeira, que obtivo unha acta de concelleiro. Esta é a que ocupa Xurxo Ferrón, que manifesta que a súa formación aposta por «ser o máis construtiva posible».
-Ve o seu grupo acadados os obxectivos?
-Algúns si, aínda que houbo cousas que se aprobaron e están sen executar. Houbo varias iniciativas relacionadas coa transparencia que saíron adiante e nese sentido avanzouse. O que non se logrou é que se nos dea con máis antelación a información dos plenos e danse casos coma o da proposta da biblioteca, na que non figuraba ningún plano de que o recinto desexado podía habilitarse no lugar escollido. Ao final facilitouse na propia sesión plenaria. Tampouco conseguimos que se fixera unha experiencia de orzamentos participativos.
-Que eivas aprecian?
-Debería existir unha maior planificación de investimentos en servizos básicos e facer as actuacións en base a criterios obxectivos. Ao mesmo tempo, deberían ser máis accesibles para concelleiros e veciños os investimentos que se levan a cabo en cada parroquia. Neste sentido, consideramos que hai que dotalas de servizos para evitar un desprazamento de poboación que pensamos que se está a dar cara a capital municipal.
-Cales son as liñas de Suma para os vindeiros anos?
-Intentaremos que se aumenten os investimentos relacionados coa conservación do existente e que se dinamicen as casas de cultura en canto a situación sanitaria o permita. Debido á pandemia, as nosas críticas á acción de goberno atenuáronse porque existían prioridades que baixo o noso punto de vista eclipsaban outras cuestións.