A Semana Cultural volve a Aguiño para honrar a Francisco Lorenzo Mariño con humor, maxia e o recordo do Santa Isabel
RIBEIRA
Os actos desenvolveranse os días 28, 29 e 30 de maio, e compoñen unha proposta «pensada para todas e cada unha das persoas» que conforman a parroquia de Aguiño
14 may 2021 . Actualizado a las 13:37 h.A Asociación Francisco Lorenzo Mariño xa ten preparada unha nova edición, e xa van 16, da Semana Cultural na que pretende divulgar a súa «identidade e tradición». Os actos desenvolveranse os días 28, 29 e 30 de maio, e compoñen unha proposta «pensada para todas e cada unha das persoas» que conforman a parroquia de Aguiño. «Queremos que se sintan reflectidos nas actividades todos os grupos de idade. Por elo programamos eventos onde grandes e cativos teñamos un espazo que ocupar», apunta a organización.
Nesta ocasión decidiuse dedicar a xornada inaugural «á efeméride da traxedia do Santa Isabel e ao comportamento heroico das veciñas e veciños de Sálvora en particular, e de Aguiño e Ribeira en xeral, naquela noite aciaga na que perderon a vida 213 persoas dos 266 tripulante».
O programa de actos
O 28 de maio, na aula de música aguiñense ás 20.30 horas, comeza a Semana Cultural con conferencias relacionadas con Sálvora e o Santa Isabel con motivo do centenario do naufraxio. Ademais, actuará o grupo de canto e pandeireta As Sete Linguas, da Asociación Francisco Lorenzo Mariño.
Na tarde do sábado 29 renderase homenaxe ao párroco que da nome ao colectivo no cemiterio de Porto do Son. O acto será ás 17.30 horas, e haberá unha ofrenda floral e a lectura dun manifesto. Acompañará un grupo de gaitas do país. Xa ás 20.30, e na aula de música de Aguiño, Cándido Pazó subirase ao escenario co seu espectáculo Eu non digo nada. Contos, comedias e outras lerias.
A maxia será a protagonista o domingo para pechar as actividades. O Mago Román fará gozar aos asistentes cunha función destinada ao público infantil e familiar, na que os trucos se mesturan co humor e no que o espectador ten un papel moi importante.
Para acudir aos espectáculos haberá que facer unha reserva previa da localidade, xa que o aforo máximo estará supeditado ás medidas anticovid vixentes no momento. Os interesados en participar nas actividades deberán enviar un correo electrónico ao enderezo aflm.aguinho@gmail.com. A organización responderá confirmando a reserva.