«Hai que loitar pola prevención, pois o alzhéimer é moi difícil de diagnosticar»

Aposta por un envellecemento activo, con adestramento tanto mental como físico


ribeira / la voz

Como psicóloga de Agadea e directora do centro de día de Ribeira, Noelia Riaño leva case unha década convivindo con enfermos de alzhéimer e cos seus familiares. Coñece de primeira man os problemas que sofren uns e outros, así como as pautas a seguir para mellorar as condicións de vida de todos eles. Mesmo participou na elaboración dun libro sobre o envellecemento activo, algo que para ela é fundamental de cara a frear o deterioro dos afectados por un dos grandes males da sociedade actual.

-Pode falarse dun perfil tipo nesta enfermidade?

-Sabemos que a incidencia é un pouco máis elevada nas mulleres e que aparece a partir dos 65 anos, se ben é certo que ás veces hai pacientes de menor idade. Tamén se pode concluír que aquelas persoas que teñen unha reserva cognitiva maior están máis protexidos.

-Cales son as claves a ter en conta para detectala?

-Hai unha serie de sinais de alarma que nos deben poñer en aviso, como poden ser perdas de memoria, dificultades para desenvolver as tarefas do día a día, problemas na linguaxe, desorientación temporal e espacial, perda de obxectos, cambios de humor... En xeral, cambios na conduta ou na personalidade.

-Cal é o primeiro paso ante a desconfianza?

-Ante o mínimo sinal de alarma é fundamental acudir ao médico de cabeceira para que faga unha exploración e, se o estima oportuno, derive ao paciente ao servizo de neuroloxía. É nas primeiras fases onde os tratamentos cognitivos son máis eficaces, polo que a detección precoz é fundamental, pois permite retrasar o desenvolvemento da enfermidade.

-Existen tratamentos eficaces?

-O alzhéimer é unha enfermidade devastadora e non hai tratamentos farmacolóxicos que a freen, polo que hai que buscar mellorar a calidade de vida dos enfermos e dos familiares con tratamentos psicosociais. Nalgúns casos, estas terapias axudan a frear os problemas en maior medida que os tratamentos farmacolóxicos.

-Como se pode previr ou retrasar a aparición do alzhéimer?

-O fundamental é ter un envellecemento activo e de calidade. Para iso, hai que ter en conta diferentes piares, como son a actividade mental e física, a alimentación e a participación social. Hai que loitar pola prevención, pois o alzhéimer é moi difícil de diagnosticar. O importante é actuar antes de que apareza e o adestramento cognitivo é fundamental.

-Pola experiencia que ten, diría que sofre máis o enfermo ou a familia?

-Ámbalas dúas partes sofren en gran medida, pero de xeito distinto. Aqueles pacientes que son conscientes do que lles ocorre sofren máis ca os que non o son. Os familiares sofren enormemente nos dous casos. As persoas coidadoras teñen unha carga que deben saber manexar.

-Como se pode aliviar esa carga dos coidadores?

-A formación e a información son fundamentais. Hai que coñecer o que hai detrás da enfermidade e para iso estamos as asociacións. Os coidadores teñen que desenvolver recursos para afrontar o día a día e teñen que contar cunha rede de apoio para mitigar esa carga.

-Chegou a ver a coidadores desesperados?

-A moitos. Cando veñen con esa sobrecarga, normalmente é porque hai falta de capacidade para afrontar a situación. Necesitan falar con amigos, pero tamén precisan apoio psicolóxico e aí xogamos un papel fundamental as asociacións.

-Cales son os principais problemas dos coidadores?

-A sobrecarga que supón o coidado dun enfermo, sobre todo cando hai trastornos de conduta, porque son moi difíciles de afrontar e de manexar. Falamos dunha sintomatoloxía psicótica, que pode derivar en delirios, obsesión polo coidador, deambulación e persecución. Obrigan a estar as 24 horas pendentes do paciente.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

«Hai que loitar pola prevención, pois o alzhéimer é moi difícil de diagnosticar»