Uns 160 dorneiros referendaron a Ramón López como novo presidente da Real e Ilustre

Unha emocionada Lydia Fernández despediuse do cargo dando as grazas polo apoio recibido


Ribeira / La Voz

A do sábado foi unha xornada de relevo ao temón da Real e Ilustre Cofradía da Dorna. Á tardiña tiveron lugar as eleccións, unha votación na que participaron arredor de 160 socios e na que, tal e como estaba previsto, resultou elixido como novo presidente Ramón López. A súa era a única candidatura presentada, pero foi referendada co apoio practicamente unánime dos dorneiros que acudiron á asemblea.

A elección de presidente era o único asunto a tratar na orde do día, así que a reunión foi breve. Trala votación, Ramón López tomou a palabra e, tal e como dixera nos días previos, anunciou que a súa directiva dará continuidade ao labor dos seus predecesores. Nesta nova etapa para a Dorna contará no seu equipo con Ander Pérez, Juan José Segade, Juanma Baamonde, Francisco Javier Gómez, Ángela Dios, María Cores, Iago Callón, Álex Nespereira, Manuel Caamaño e Andrés Pérez.

Fin dunha etapa

A nova directiva supón unha renovación practicamente total con respecto á que capitaneou o rumbo da Real e Ilustre nos últimos anos. En nome de todos eles, a xa expresidenta, Lydia Fernández, deu as grazas polo apoio recibido no tempo que estiveron á fronte da entidade.

Fernández recoñeceu o traballo desenvolvido por todas as directivas da Cofradía da Dorna desde a súa fundación, asumindo que «todas fixemos o que puidemos pensando en que era o mellor para a asociación». Agradeceu tamén o respaldo prestado polo Concello de Ribeira, a Xunta e a Deputación, así como ás empresas, comerciantes, patrocinadores, tecido asociativo e centros educativos que dun xeito ou outro colaboraron coa Real e Ilustre nos últimos anos e se involucraron nas súas actividades.

Unha emocionada Lydia Fernández recoñeceu que «nos sentimos moi arroupados todos estes anos» e pediulle á nova directiva «respecto e responsabilidade polo cargo que van ocupar, tendo en conta que a Dorna forma parte da memoria colectiva de Ribeira e a asociación conta cun importante respaldo social». Avogou por continuar poñendo en valor a cultura mariñeira, e puxo especial énfase no agradecemento á directiva que a acompañou e a «todas as persoas que nos apoiaron. Foi imprescindible para sacar isto adiante».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

Uns 160 dorneiros referendaron a Ramón López como novo presidente da Real e Ilustre