Anxo Martínez: «O Aguiño debería estar en Primeira»

O adestrador da Tasca valora o compromiso como piar do seu fútbol e critica o actual estado do deporte rei en Ribeira


Ribeira / la voz

Anxo Martínez (Ribeira, 1983) é un home feliz á fronte do Xuventú Aguiño. Logo dunha breve etapa en A Tasca como futbolista, decidiu cambiar de rol para colocar ao club onde, pola súa historia, considera que se merece.

-Son o equipo revelación do comezo de liga en Terceira Galicia.

-Eu non mo tomo así. Xa lle dixen aos rapaces que o importante é estar xuntos. Se ao final do ano acabamos os mesmos que o comezamos, estarei contento.

-A súa filosofía pasa por formar un vestiario sólido entón.

-Si, e estámolo logrando. Van poucas xornadas, pero espero que non cambie. Sei que será difícil manter o nivel de compromiso todo o ano. Ao final os xogadores somos egoístas e todos queremos saltar ao campo.

-E non teñen ningún obxectivo na táboa clasificatoria?

-A única meta é o que xa che dixen, chegar todos xuntos a maio. Penso que é o máis importante. Se iso funciona, logo non temos que quitarnos retos.

-Que nivel ten esta liga?

-Está moi igualada, calquera pode gañar a calquera. Non podes ir de paseo a ningún lado.

-E os candidatos a subir?

-Eu penso que deberíamos estar nós, aínda que soe prepotente, e Oleiros, Furia, Dodro, Baroña e Palmeira.

-Por equipo, por experiencia?

-Por experiencia, por compromiso... Considero que todos estarán arriba.

-E cal é o fútbol que quere facer Anxo co Aguiño?

-O primeiro é que os rapaces o pasen ben, que intenten xogar a bola. Cando non se pode, tocará escachala, pero a nosa idea é intentar xogar, presionar e morder. Iso é primordial. Eu era así como xogador e quero que o sexan eles tamén. Coa sorte que teño de que eles son mellores do que era eu como futbolista (ri).

-Ten bastantes xogadores que traballan fóra.

-A día de hoxe están todos aquí, pero penso que temos un equipo bastante compensado. Que estea un ou outro non se notará.

-Como é o caso de Pol.

-Estará poucos días con nós. É un xogador que marca as diferenzas, pero tampouco vai a decidir a liga. Iso farao todo o equipo.

-Por que colleu as rendas?

-Non tiña pensado adestrar. Por motivos laborais é bastante complicado, pero vin o interese dos rapaces e da directiva. Fixen ese esforzo para apoialos e non me arrepinto. Se mo preguntan de novo, agora non o dubidaría.

-Xa estivera de técnico aí.

-Fai seis anos, cando levaba bastante tempo sen xogar, fichei un ano. O seguinte adestrei e subimos. Logo, por circunstancias, tiven que apartarme. Agora espero deixalo onde ten que estar.

-Onde ten que estar logo?

-O Aguiño debería estar en Primeira ou Segunda, sinceramente así o creo. É un equipo histórico e, se miras os xogadores da zona que están en categorías superiores, o 90 % saíron da canteira do Aguiño. É o equipo que mellor traballa cos rapaces, e dunha maneira desinteresada. Xente como Rosa ou Mari non a atopas en ningún sitio. Oxalá non falten nunca.

-Xa que non ten pelos na lingua. Como ve o fútbol ribeirense?

-Está viciado, hai unha competencia moi grande entre tódolos equipos que non leva a bo porto. Hai que sentarse e facer un equipo, chámase como se chame.

Curtiña e ao pé

Unha xogador: Raúl González

Un estadio: A Tasca

Un gol: Calquera de Cadórniga.

Un adestrador: Eu mesmo

Un ídolo: Meus pais

Unha película: Gladiator

Un lugar: O Ventos Vellos

A súa comida favorita: Spaguettis con aliñas de polo

Un soño: Adestrar a Jorge Cadórniga, aínda que xa o teño cumprido

Un equipo de lenda: O Madrid de Ronaldo o brasileiro.

Un deporte que non sexa o fútbol: Os dardos

Unha canción: Bailar pegados, de Sergio Dalma

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Anxo Martínez: «O Aguiño debería estar en Primeira»