Pepe Currucho: «A xente quéreme ben, é o que levo dos 40 anos de traballo como carniceiro»

O trato cos clientes foi para el o mellor dunha traxectoria laboral que finaliza


ribeira / la voz

A praza de abastos de Ribeira vén de quedarse orfa. Perdeu un dos seus vendedores máis simpáticos, unha persoa á que poucas veces lle faltaba o sorriso. José Rodríguez Deán, coñecido como Pepe Currucho, decidiu atravesar a liña e iniciar a etapa dourada da xubilación. Despois de catro décadas exercendo como carniceiro, primeiro nun negocio que agora rexenta a súa muller en Porto do Son, localidade na que reside, e desde hai 24 anos no mercado de Santa Uxía, asegura que lle custou un pouco tomar a decisión, xa que lle encanta estar detrás dun mostrador para conversar cos clientes.

Vaise plenamente satisfeito: «Nunca tiven un problema con ninguén, nin sequera unha discusión. Na praza de Ribeira hai de todo, como en todas partes, pero podo dicir que a convivencia, no que a min se refire, foi boa». Marcha, de feito, cunha chea de amigos e un feixe de anécdotas: «Para min, o mellor de todo este tempo foi a relación cos clientes, aos que lle contaba chistes e tamén lles botaba algunha que outra reprimenda». Pero, para el, sempre rexeu o dito de que o cliente ten sempre a razón, aínda que en máis dunha ocasión considerara o contrario: «Pasábame moitas veces, que alguén se empeñaba nun produto que non era o mellor, pero no último momento tiña que darlle a razón, pois o que paga, manda».

Desde o seu posto na praza de abastos ribeirense, José Rodríguez foi testemuña do gran cambio que experimentou o sector coa apertura dos grandes supermercados: «As ventas baixaron drasticamente, eu penso que nos últimos tempos vendemos a metade do que despachábamos antes. Aquí segue a vir a xente maior, pero o resto prefiren as grandes superficies que lles ofrecen outros servizos, como pode ser o aparcamento». El insiste en que a calidade do produto segue a ser o punto forte dos mercados: «Eu o día de Noiteboa levanteime ás sete da mañá para ir polas aldeas mercar cordeiros e tenreiros que levei ao matadoiro, ofrecendo unha carne fresca».

Facilidade de palabra

Aínda recoñecendo que o traballo é sacrificio, o veciño de Porto do Son confesa que lle dá mágoa deixar para sempre o seu posto: «Polo ben que o pasaba si que me doe deixalo. Pero, por outra banda, tendo en conta todo o que levo traballado e sabendo que os meus fillos non queren coller o relevo, pois mellor irme hoxe que mañá». Ao longo desas catro décadas, Rodríguez Deán percorreu boa parte de Galicia mercando carne. Esas viaxes traducíronse en gratas experiencias, pero o seu punto forte sempre foi o contacto cos clientes: «A xente quéreme ben, é o que levo dos 40 anos de traballo como carniceiro». Coñecido pola súa facilidade de palabra, recoñece que non é a primeira vez que escoita frases do tipo: «Corta máis e fala menos, coma se eu non puidera facer as dúas cousas a un tempo».

De entre tantos aspectos positivos que tivo a súa longa traxectoria profesional, o sonense tamén menciona algún negativo: «O que menos me gustaba era limpar patas e tripas para os callos, pero deixamos de facer iso, porque todo viña xa preparado do matadoiro. Entón xa empezou a ser todo unha marabilla».

O que foi ata o de agora o seu veciño de posto, quedarase co espazo que el rexentaba na praza de abastos ribeirense. A el e ao resto dos vendedores do recinto, José Rodríguez deséxalles sorte, engadindo que lles augura un prometedor futuro: «O mercado ten tres ou catro meses de inverno que son moi frouxos, pero no verán as ventas son boas. A xente de fóra vén cansada do produto dos centros comerciais e, ás veces, nin miran o prezo do que compran».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Pepe Currucho: «A xente quéreme ben, é o que levo dos 40 anos de traballo como carniceiro»