A memoria de Plácido non se borra

O Leliadoura pon o nome do profesor a unha aula e vanse recoller firmas para que se lle dedique unha rúa


RIBEIRA / LA VOZ

Cando se cumpre unha semana do pasamento de Plácido Betanzos García, exconcelleiro de Ribeira, profesor e escritor, a súa memoria permanece e sucédense as iniciativas para que se manteña no tempo, como ocorre no instituto Leliadoura de Ribeira, onde exerceu a docencia ata a súa xubilación. A aula na que ensinaba pasará a ter o seu nome, a raíz dunha iniciativa que partiu do alumnado o pasado luns.

Segundo explicou a xefa de estudos do Leliadoura, Carina Sánchez, na primeira xornada lectiva tralo falecemento de Plácido, a tristeza era evidente no centro educativo, especialmente entre os alumnos dos cursos superiores, que foron os que o tiveron de profesor, polo que, o mesmo luns, optouse por convocar un acto de homenaxe de 10 minutos no primeiro recreo, para que quen quixera fixera unha exposición. Sánchez asegura que as intervencións foron moi emotivas, e, ao remate da xornada, presentaron un escrito avalado por un feixe de firmas pedindo que a coñecida como aula dos ratos, chamada así porque nela están os ordenadores, recibise o nome de Plácido. Dito e feito, e xa está encargada unha placa.

Iniciativa popular

Por outra banda, tamén se está a poñer en marcha unha recollida de sinaturas por todo o Concello, co fin de que lle sexa dedicada unha rúa en Palmeira. A idea da iniciativa é repartir impresos por distintos lugares coa intención de que a xente que o desexe poda sumarse á proposta.

Os impulsores desta outra homenaxe popular pretenden xuntar o número suficiente de apoios para entregalos no Concello de Ribeira co obxectivo de que a corporación municipal se pronuncie sobre a proposta.

Agradecemento ante unha perda irreparable

Familiares de Plácido Betanzos

Os familiares de Plácido Betanzos non podemos máis que agradecer as demostracións de cariño e apoio recibidas tralo seu falecemento, pero tamén ao longo do difícil ano no que loitou contra a enfermidade. Eramos conscientes das virtudes que atesouraba Plácido porque as vivimos en primeira persoa, pero estas quedaron referendadas nestas difíciles xornadas, a través das manifestacións de dor e, ao mesmo tempo, de recoñecemento á súa figura.

Por iso é o noso desexo facer constar publicamente a nosa gratitude á comunidade educativa do instituto Leliadoura, aos seus compañeiros e compañeiras, aos alumnos e alumnas, polas iniciativas para que a memoria de Plácido perdure no centro educativo; as e aos representantes públicos de todas as formacións políticas, xa que, coa asistencia aos actos, constataron a súa capacidade para superar calquera barreira ideolóxica; aos seus amigos e amigas, porque confirmaron que o cultivo da amizade que sempre caracterizou a Plácido deu froitos; aos veciños e veciñas, que evidenciaron o cariño da súa convivencia; ao cura párroco de Palmeira, D. Manuel Antonio, polas facilidades que nos deu para o acto, en resumo, queremos dar as grazas a todos e todas en xeral, porque formastes parte da súa vida e formádela da súa memoria.

Seguir leyendo

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
9 votos
Tags
Comentarios

A memoria de Plácido non se borra