Hoxe será o turno dos estudantes do Brea Segade, que tamén participarán no proxecto «A vila do mañá»
18 jun 2026 . Actualizado a las 11:30 h.O proxecto A vila do mañá regresou a Rianxo este mércores para que o alumnado do CEIP Castelao retratase a súa contorna. A arquitecta Sandra González, impulsora da proposta, pediulles que debuxaran os elementos que configuran a identidade local, «o 70 % dos debuxos foron da tenda de larpeiradas Picariños», comenta entre risas.
Tras este primeiro resultado, procedeuse á realización dunha tormenta de ideas, onde os estudantes xa identificaron elementos como «as xoubiñas de Rianxo», o casco de Leiro, as prazas da localidade, as figuras de Castelao, Manuel Antonio e Rafael Dieste, ou lugares con valor histórico como o Pazo do Martelo ou a igrexa de Santa Columba.
O resultado da actividade foi a creación dun taboleiro xigante de 3,5 por 3,5 metros pintado no chan, que funciona como un xogo da oca adaptado á realidade do concello. O taboleiro busca ensinar a historia e os símbolos de Rianxo, contando con casillas que fan referencia ao patrimonio e aspectos tradicionais, cun dado de gran dimensión para o movemento das pezas, que neste caso son os propios participantes.
Grafiti en man
A iniciativa foi recibida con gran entusiasmo polos estudantes, que participaron activamente na creación dos padróns e na configuración do taboleiro: «No momento que lle pos un espray de grafiti na man, é o máximo que poden facer, entón están emocionados».
Trala xornada no Castelao este mércores, hoxe tócalle a quenda ao alumnado do CEIP Brea Segade, que participará tamén na iniciativa A vila do mañá, guiados de novo por Sandra González.