Formoso afirma que a Deputación destinará dous millóns de euros a un proxecto social en Rianxo
RIANXO
O líder dos socialistas falou con membros da plataforma que pide a creación dun centro de día na localidade
26 jul 2022 . Actualizado a las 05:00 h.Integrantes da plataforma polo centro de día de Rianxo aproveitou o acto celebrado onte na vila polo PSdeG con motivo do Día de Galicia para reclamar, mediante unha pancarta, a posta en marcha do servizo. Unha vez rematada a súa intervención, o secretario xeral do PSdeG, Valentín González Formoso, achegouse ao grupo para escoitalos e achegarlles o seu respaldo.
O líder dos socialistas galegos aseverou que o organismo encargado de construír ese tipo de espazos é a Consellería de Política Social: «Creo que o Goberno autonómico abandona toda a Barbanza non creando en Rianxo un centro de día. A Xunta é a que posúe a competencia, os orzamentos e a obriga legal de facelo. Teñen que ser as institucións socialistas as encargadas de incentivar estes proxectos, poñendo enriba da mesa recursos económicos suficientes».
González Formoso asegurou que a Deputación, sen competencias, aportará fondos. Profundando neste aspecto, indicou que «nós temos aprobados os recursos económicos para un proxecto social para os maiores, que decidirá o Concello de Rianxo». En concreto, manifestou que «temos dous millóns de euros para promover ese centro, cando nos pedían 600.000».
Atender aos maiores
O secretario xeral do PSdeG mostrouse optimista con respecto ao desenvolvemento dun recinto para os maiores no municipio: «Temos o deber de procurar polos maiores de 65 anos. En concreto, estamos a falar de que tan só en Rianxo de cerca de tres mil persoas están abandonados á súa sorte nos seus domicilios». Os integrantes da plataforma manteñen viva a súa demanda con concentracións como a levada a cabo onte.
Ademais de aproveitar actos públicos para dar visibilidade a súa demanda, todos os domingos saen á rúa co mesmo propósito e poñer de manifesto que o seu obxectivo aínda está sen acadar. Pasados cinco anos dende o encerro que propiciou a compra do pazo de Rianxiño coa intención de convertelo nun centro de día, os veciños seguen á espera dunha resolución satisfactoria.