Iago Hermo: de estudar en Rianxo a tocar o piano en Xapón

Mireia García RIBEIRA / LA VOZ

RIANXO

O compositor estreou a súa ópera, escrita en galego, nos Países Baixos e percorreu Europa coa súa música

17 abr 2022 . Actualizado a las 05:00 h.

Desde ben pequeno sempre estivo interesado pola música, pero foi aos 13 anos cando Iago Hermo (Rianxo, 1992) tocou por primeira vez o piano. Empezou estudando frauta na Escola de Música de Rianxo, pero non conectou co instrumento. «Ao principio ía unha vez á semana a clases de piano, pero pouco a pouco gozaba cada vez máis», conta ao ser preguntado polos seus inicios como pianista. Comezou a ir todas as tardes a tocar o piano pola súa conta ata quedar «completamente enganchado».

Sempre quixo estudar economía, pero a paixón pola música levou ao mozo rianxeiro a inscribirse no conservatorio de Santiago de Compostela. Ao remate desta etapa, decidiu especializarse en piano cursando estudos superiores no centro da Coruña. Durante ese período estivo compaxinando a formación musical cun máster en xestión cultural. Narra que a súa elección non foi «algo idealista nin romántico», simplemente sentiuse cada vez máis cómodo coa música. Gustaba de todo o relacionado co desenvolvemento da cultura.

Experiencia en Maastricht

Cursou o último ano do máster nos Países Baixos grazas ao programa de intercambio Erasmus. O músico de Rianxo adaptouse moi ben ao novo destino, por iso consultou a posibilidade de realizar o grao en Composición Musical, e foi o director da universidade de Maastricht quen lle propuxo cursar directamente o título de posgrao no conservatorio da cidade.

O talento do pianista rianxeiro non pasou desapercibido entre os profesores e compañeiros. «Grazas á confianza que depositaron en min, estudei cunha beca baixo a tutela do mestre Vykinitas Baltakas», indica, despois de especializarse en composición e dirección musical.

Respecto á súa experiencia nos Países Baixos, destaca dous momentos que considera relevantes na súa carreira profesional. Como proxecto de fin de máster presentou a súa primeira ópera, escrita en galego e dirixida por el mesmo. «A estrea ante o público do meu traballo foi un dos momentos máis especiais», declara o rianxeiro, que destaca tamén «o equipo tan humano e profesional» do que estivo rodeado, tanto os músicos como o persoal de produción.

Ata o país nipón

Non sabía, afirma, como sairía o experimento de escribir unha ópera nunha lingua pouco coñecida nos Países Baixos, pero «o resultado foi mellor do que esperabamos». Con tan só 28 anos, o rianxeiro levou a súa composición ata Xapón.

A obra que escribiu está baseada na historia da illa xaponesa de Gunkanjima, en Nagasaki: «Buscaba unha escusa para abordar os excesos do cambio climático mediante un entorno que estaba dedicado ao carbón e ao sector mineiro». Foi un compañeiro xaponés do conservatorio de Maastricht quen invitou a Hermo a tocar no país nipón.

Durante a súa estancia na cidade holandesa, Iago Hermo non só se dedicou a estudar, tamén impartiu clases de piano. «Ao principio era un profesor moi malo, pero co tempo buscas mellorar e aprender dos erros», comenta o músico, que xa daba clases particulares en Rianxo, con tan só 17 anos.

En setembro volveu a Galicia para poñerse aos mandos do departamento de piano e a xefatura de estudos do Conservatorio Histórico de Santiago. «Esta nova etapa comezou sendo algo caótica porque tiven que asumir todo de golpe», explica Hermo, que agora permítese presumir de ter plans para fomentar a música.

Proxectos futuros

«É unha escusa, pero no bo sentido» di o compositor ao falar do que significa para el a música. Resalta que a el serviulle de pretexto «para viaxar, aprender». No referente ao futuro, adianta que escribiu unha peza de 15 minutos para instrumentos de percusión sen especificar, un reto proposto polo seu compañeiro xaponés. A peza estrearase en Xapón a finais deste ano.

Engade que ten preparado un novo concerto de piano electrónico que leva por nome: Brutaal. E para rematar, asegura que «está de camiño a próxima ópera».