As letras vencen ao covid en Rianxo

La Voz

RIANXO

CARMELA QUEIJEIRO

Ricardo Losada encargarase do pregón o xoves e Esther Carrodeguas sumarase ao peche

18 jul 2020 . Actualizado a las 05:00 h.

A crise sanitaria desencadeada polo coronavirus provocou a suspensión de boa parte das festas e grandes actividades lúdicas previstas para o verán en Barbanza, pero a Feira do Libro de Rianxo logrou salvarse da criba. A cita arrancará o xoves no Campo de Arriba da vila e prolongarase ata o domingo. O eixo serán os postos das librarías Pedreira, Ler, Cándido, Ben, A Gata Tola e Cortizas. De xeito paralelo á venda de volumes cun desconto do 10 % que ofrecerán estas casetas desenvolveranse diversas actividades de carácter literario.

O escritor local Xosé Ricardo Losada será o encargado de inaugurar a feira, ofrecendo o pregón (xoves, 13.00 horas). Volverá a intervir no peche desa primeira xornada, ás 21.30 horas, para asinar exemplares do seu libro A casa xunto ao volcán. A maiores, a boirense Natalia Carou achegarase ás 20.30 a Rianxo para divulgar a súa última obra, O mal querer.

Para a xornada do venres están programadas as visitas de María Xesús Blanco, que vén de lanzar O caderno de Rosalía; Juan J. Prieto, que está a divulgar La sonrisa eterna; José María Rodríguez, que asinará Liortas viquingas; Charo Baleirón, que vén de rematar un libro sobre Carballo Calero; e Francisco Leira Castiñeira, que poñerá a disposición do público Soldados de Franco.

A noite do lobo, de Abel Tomé; Migratoria, de Andrea Fernández; La piedra del destino e El guardián de las flores, de Rober H. Cagiao; Formigas nos pés, de Nazaret López; e Guerreiras de lenda, de Maite Mosconi, serán os libros que cobrarán relevancia o sábado en Rianxo coa chegada dos seus autores á vila.

Desembarco final

E para a xornada final desta edición da Feira do Libro de Rianxo, a do domingo, hai programado un novo desembarco de escritores, cos que os asistentes terán ocasión de intercambiar impresións. Trátase de Antonio Piñeiro, coa súa obra Celada; Eduardo Estévez, con Sen fin; Charo Lopes, con Álbum; César Lorenzo e Jorge Campos, con Atlas da Galicia pequeniña, e Víctor Vázquez, con Los días siguientes. Do peche encargarase Esther Carrodeguas, que asinará exemplares de Malcriada.