Manuel Lodeiros Astray faleceu o martes
24 ene 2020 . Actualizado a las 13:05 h.Home calado e de carácter tranquilo, Manolo Lodeiros, coñecido na parroquia rianxeira de Asados como Manolo o das Lejías polo negocio familiar que contribuíu a levantar, foise esta semana como viviu, sen facer demasiado ruído. Din os veciños cos que conviviu desde que casou con Chita que era apracible, conciliador e cordial, desas persoas que non adoitan queixarse por nada e que saben adaptarse ás circunstancias, tanto, que ata se deixou contaxiar pola febre do teatro.
Coñeceu a Chita en Santiago, onde vivía coa súa familia, cando ela estudaba, e veu parar á casa dun histórico do teatro como era o seu sogro, Ramón Pimentel, director do grupo Airiños durante décadas. E a pesar do seu carácter introvertido, ou cando menos esa era a imaxe que proxectaba cara quen non o coñecía na intimidade, non puido evitar a chamada das táboas e tamén subiu ao escenario con Airiños para algunha que outra representación, como A Fiestra Valdeira. A familia do teatro de Asados está tamén de loito porque a filla e as netas de Manolo continúan coa saga e son actrices importantes no elenco da compañía.
No profesional, Manolo levou as rendas da fábrica de lixivias Los Cuatro Vientos, encargándose da distribución e venda e da expansión do negocio. E no persoal, será recordado coma un bo veciño e un bo pai de familia, que ademais soubo aproveitar a vida ata os últimos instantes.