Duarte Galbán fixo de mestre de cerimonias no arranque das celebracións
14 sep 2019 . Actualizado a las 21:27 h.Rianxo está en festas. A pasada medianoite comezaban oficialmente as celebracións da Guadalupe co chupitaso de rigor e a vila enteira empapábase do ambiente de alegría e diversión que se prolongará ata o vindeiro sábado pola mañá.
O feito de que o mesmo ritual se repita ano tras ano non resta nin un chisco de emoción a un momento que os rianxeiros agardan durante todo un ano. Moito antes da hora prevista, os veciños xa tomaban posicións na praza Castelao. En primeira fila, a pé das portas da casa consistorial, estaba unha nutrida representación das juadalupeñas que, en canto soou o estoupido do petardo que anuncia o comerzo da Guadalupe, deu renda solta ao desfreo e a unha auténtica ducha de bebidas de todos os sabores que regaron as lousas da praza e a todo aquel que andivera polas inmediacións.
Hai xa uns anos que o pregón das celebracións se trasladou ao sábado, pero sempre se conta con alguén que, a modo de mestre de cerimonias, introduza o chupitaso na noite do venres. Desta volta, o encargado desta tarefa foi o televisivo rianxeiro Duarte Galbán. Fíxoo, iso si, un pouco atropeladamente, porque a xente estaba impaciente por comezar coa festa. Recoñecía certo nerviosismo porque xogaba na casa, pero saíu airoso tirando de humor e retranca. Lembrouse, por exemplo, do xefe da Policía Local, que se xubilará ao rematar a Gualupe: «Este ano Maneiro dános a Guadalupe libre, podemos facer o que queiramos». Aludiu tamén ao «sentidiño» que sempre se pide nestas datas, sobre todo á hora de coller o coche, e abogou pola diversión, pero con xeito.
Dito isto, e depois de que a comisión das juadalupeñas pasara lista para asegurarse de que non faltaba ninguén no campo da festa, comezou unha acelerada conta atrás que deu por inaugurada A Guadalupe 2019. E que viva a Moreniña!