José Ramón Parada: «Temos que ser un conxunto»

A. Parada RIBEIRA / LA VOZ

RIANXO

DANI GESTOSO

O técnico do Barbanza Rugby Club analiza as necesidades do equipo para mellorar unha temporada lastrada

07 ene 2019 . Actualizado a las 05:00 h.

Con botarlle unha ollada ao currículo deportivo de José Ramón Parada (Vilagarcía de Arousa, 1973) non é complicado entender por que ten máis que mérito de sobra para estar á fronte do Barbanza Rugby Club Clínica Mares. Xogador da lenda lucense do Euita RC, chamado a filas polo histórico Xabaril e peza clave de Os Ingleses dende 1996, o técnico foi claro ao concretar as necesidades do equipo barbancés para mellorar os seus resultados nunha tempada en segunda rexional que se lles está resistindo. A receita é que o bloque da serea sexa iso, un bloque.

-¿Podería facer unha valoración xeral do primeiro ecuador da tempada para o Barbanza?

-Foi difícil. Comezamos cun nivel moi baixo no aspecto técnico, aínda que no aspecto de xogo non fose así. Temos uns cinco xogadores para os que este é o seu primeiro ano e no rugbi necesítase tempo. É dicir, o inicio foi duro porque cousas básicas que dás por sentadas non se coñecían e iso provoca que moitas veces perdamos o balón. Cheguei aos adestramentos cunha idea e tiven que dar marcha atrás para comezar de cero.

-¿Onde fraquea o equipo?

-Non acabamos de engancharnos aos encontros. É certo que merecemos gañar algúns partidos, pero con que só dous xogadores se desconecten un instante estamos perdidos. Fisicamente acaban ben, pero é o momento de falta de concentración o que nos fai perder. Eses 15 minutos no que che fan dous ensaios.