José Figueira: As campás de Asados dobraron por un dos seus últimos campaneiros

Os seus veciños despedírono onte no cemiterio parroquial


Ribeira / La Voz

Onte, á primeira hora da tarde, dobraron as campás de Asados. Nestes tempos nos que as novas tecnoloxías son a solución para case todo, era un mecanismo automático o que se encargaba de anunciar que había enterro, pero non hai tanto tempo eran persoas de carne e óso as que tanguían os metais e coñecían ese código preciso que tan interiorizado teñen, sobre todo, os maiores, para saber cuns poucos toques que había morto na parroquia. Agora case non quedan campaneiros, e onte a quen despedían en Asados era, precisamente, a un dos últimos, José Figueira Ordóñez.

Veciño do lugar das Folgueiras, hai uns anos era José o encargado de facer repicar as campás cando había acontecementos importantes. Pero non eran os metais o único instrumento que dominaba, tamén era experto nos de vento, e durante anos exerceu como músico poñendo o seu talento e bo facer ao servizo da banda rianxeira.

Tamén era coñecido en Asados polo seu labor colocando os arames das viñas de boa parte dos veciños da redonda.

José Figueira recibiu o último adeus onte pola tarde na igrexa de Asados, onde se oficiou un funeral antes de recibir sepultura no cemiterio parroquial.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Tags
Comentarios

José Figueira: As campás de Asados dobraron por un dos seus últimos campaneiros