O investigador Martín Fernández Calo, premio Murguía cun ensaio sobre os soberanos da Galicia castrexa
PORTO DO SON
O investigador Martín Fernández Calo (Porto do Son, 1990) gañou o premio Manuel Murguía de ensaio na súa 12.ª edición coa obra Callaici principes. Os soberanos da Galiza castrexa, traballo no que reivindica a Galicia antiga como suxeito historiográfico de seu.
O galardón -promovido pola Deputación da Coruña- ten unha dotación económica de 6.500 euros e comporta tamén a publicación do texto. O xurado, composto, entre outros, por Miguel Anxo Seixas Seoane, Rebeca Baceiredo Pérez, Iria Veiga Ramos e os gañadores da edición anterior (Raúl Sotelo Vázquez e José Manuel Vázquez Lijó), enxalzou «a claridade expositiva» da obra.
«A investigación amosa unha profunda e rigorosa análise da institución de principes na Callaici da antigüidade, cun amplo marco comparativo no eido xeográfico europeo. É singularmente meritoria dadas as dificultades da interpretación social do rexistro material de época castrexa», incide o fallo, que destaca tamén que «a tese dunha xefatura indíxena (asimilable ao concepto de princeps gentis) prerromana que persiste na época Xulio-Claudia descansa nunha sólida argumentación teórica, grazas á lectura científica do limitado corpus epigráfico, dun rico abano de clásicos latinos e de copiosas e pertinentes referencias bibliográficas (galegas, españolas e estranxeiras)». O xurado subliña tamén que o estudo está moi ben redactado e é moi preciso terminolóxica e conceptualmente.
Fernández Calo xa publicou Estado, poder e estruturas políticas na Gallaecia: séculos II a. C.-VIII d. C. (Blukk, 2018).