Emilio Queiruga: «Debemos lograr que os barcos de artes menores vendan na lonxa»

Membro dunha familia de mariñeiros, comezou a traballar con 13 anos e coñece cales son as necesidades do sector


ribeira / la voz

Pese a que leva moitos anos vinculado ao mar e a que, explica, en tres ocasións foi o socio da confraría que máis apoio tivo para converterse en patrón maior, non foi ata as eleccións do 29 de setembro cando Emilio Queiruga Santamaría decidiu aceptar o cargo. Afirma que é moita responsabilidade e que lle vai resultar difícil conciliar o traballo e o seu novo cargo coa súa vida familiar: «Hai días nos que penso: vaia enredo no que me metín».

-A confraría atravesou por momentos económicos difíciles. Manter o actual nivel de ingresos é unha das prioridades?

-A entrada dos barcos do cerco supuxo unha importante inxección económica. Pasamos dos 300.000 euros a superar o millón de euros en vendas. Nós dependemos moito do polbo. Na actualidade temos dous cerqueiros con autorización provisional e a nosa intención é proporcionarlles os servizos que precisan. Non nos metemos aquí para xerar cartos, pero está claro que cos ingresos que obtemos podemos facer moitas cousas.

-Non pensan en ampliar o número de embarcacións que operan no peirao?

-Debemos lograr que barcos de artes menores vendan na lonxa. A maioría comercializan os seus produtos en Ribeira porque hai máis compradores e o prezo que se paga pola mercadoría é moito maior. Podo poñer un exemplo coa navalla. Primeiro poxábase aquí, pero tivemos que ir a Santa Uxía porque os compradores non acudían a Porto do Son e, se o facían, viñan coa rebaixa dos prezos. O problema é que do que se comercializa fóra recibimos un retorno do 1 %, salvo no caso do percebe, e iso afecta ás contas. Eu teño que buscar o mellor para os socios e temos que mirar onde acada máis valor o peixe.

-Poderán darlle cabida a máis barcos do cerco?

-Viñeron uns do País Vasco, pero só estiveron un día. O peirao sonense queda pequeno e precisamos máis calado. Estamos a xestionar unha reordenación. A nosa intención é que se constrúa un peirao de atraque e facer un cambio na instalación de pantaláns para que os cerqueiros dispoñan de maior espazo. Temos outro contratempo, que é a falla de calado. Ademais, hai unhas pedras que obrigan aos cerqueiros a entrar moi arrimados á punta do peirao. Eles xa nos advertiron de que calquera día pode producirse un incidente.

-Pero hai interese?

-Si, hai barcos do cerco de Ribeira e Aguiño que pediron amarrar aquí. Tamén poderían facelo outras embarcacións da Costa da Morte cando se atopen traballando na zona. Ademais, este porto é moi bo neste sentido porque os barcos saen directamente ao mar e a unha zona de pesca, non teñen que desprazarse.

as novas confrarías

«Os mozos ven na pesca unha alternativa»

Na súa chegada ao cargo tivo unha madriña de excepción: a conselleira do Mar, Rosa Quintana, que acudiu para animalo na etapa que acaba de iniciar.

-Aproveitou o almorzo con Rosa Quintana para facer demandas?

-Estoulle moi agradecido pola deferencia de vir e polo apoio que me amosou, pero claro que aproveitei para facer algunha solicitude. Unha das prioridades é a eliminación das pedras na entrada ao peirao. Xa se fixo no pasado unha actuación, pero non é suficiente.

-Outra das carencias do porto é a falla de servizos.

-Para os barcos do cerco si que temos algunhas carencias, pero estamos intentando arranxalas. Por exemplo, non temos fábrica de xeo. Agora o que imos instalar é unha máquina de máis capacidade. Moitas veces tiñan que ir a Muros para collelo. Somos conscientes das nosas limitacións, por iso queremos realizar un esforzo. Os dous cerqueiros que atracan e venden aquí teñen permiso provisional, pero estase a traballar para lograr o definitivo.

-Cos problemas que hai no sector do mar, os mozos están interesados na actividade?

-Os mozos ven na pesca unha alternativa. O que hai que facer é formalos. Nós temos armadores novos, xente que colle o relevo porque seus pais se xubilan. Considero que hai un interese por parte da mocidade e incluso observo que lles gusta. Iso si, a formación é un dos aspectos claves. Neste sentido, agardo poder conseguir o apoio da Administración para levar a cabo actividades na entidade.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Emilio Queiruga: «Debemos lograr que os barcos de artes menores vendan na lonxa»