Critica a actuación do BNG, que cualifica de carente de rigor
12 may 2022 . Actualizado a las 20:03 h.A formación Compromiso Outes, ao fronte do goberno no Concello, expresou a súa preocupación polo desenvolvemento das obras de rehabilitación en Pontenafonso, despois do modificado efectuado no proxecto. O grupo político considera «pouco afortunado» o encaixe do novo peitoril de pedra cos tallamares existentes, en particular pola diferenza de alturas.
Por este motivo, solicita á Xunta que estude o problema e que trate de darlle unha solución coherente co valor patrimonial da ponte.
Compromiso Outes cuestionou a decisión de mudar a varanda inicialmente prevista de metal polo peitoril de pedra, ao entender que se fixo de maneira improvisada e sen reparar no encaixe cos elementos preexistentes da ponte.
Neste sentido, dende o partido indicaron que «pódese entender que haxa cambios por cuestións sobrevidas, como foi a elevación da rasante por atopar elementos imprevistos, pero o tipo de varanda debería terse claro dende un principio e non cambiala no medio da execución do proxecto. Estas variacións deben analizarse e realizarse logo dun estudo en profundidade, non a golpe de titulares».
Tamén criticou a actuación do BNG de Outes, que cualifica de falta de rigor «primeiro criticaron o uso de adoquíns reclamando a recuperación do firme orixinal, ocultando que non sería compatible co tráfico rodado sobre a ponte. Despois reclamaron a colocación de un peitoril de pedra que a Xunta incluíu e agora considérano unha deturpación».