O centro recibirá 1.000 euros para facer melloras
16 may 2021 . Actualizado a las 10:29 h.O terceiro concurso de Podcasts-Radio na Biblio, que convoca a Xunta xa ten gañadores. Un total de oito centros educativos de toda Galicia resultaron premiados con traballos realizados ao abeiro do programa Radio na Biblio e arredor da figura de Xela Arias, co gallo do Día das Letras 2021. Na modalidade de infantil e primeiro ciclo de primaria os premiados son No berce da lingua, do CEIP Plurilingüe de Outes (Outes) e As aventuras do avó Manuel, do CPI Plurilingüe de Rodeiro. No caso da modalidade para alumnos de 3º a 6º de primaria, os gañadores son Entrevista á nena Xela Arias, do CPI As Revoltas (Cabana de Bergantiños) e Na busca do felino, do CEIP Mestre Manuel García (Oia).
Na categoría de alumnado de secundaria os galardoados son Xela é moita Xela, do CPI de Cervantes, e Poesía que alimenta, do IES Monte Carrasco (Cangas). Finalmente na modalidade de estudante de ensinanzas de bacharelato, de persoas adultas ou ciclos formativos, resultan premiados Voces para Xela, do IES Punta Candieira (Cedeira), e Exóticas, da Escola Oficial de Idiomas de Vilagarcía de Arousa.
Para participar neste certame os centros debían presentar traballos sonoros como entrevistas, cuñas publicitarias, noticieiros, faladoiros, debates ou programas monográficos, entre outros formatos, todos eles en lingua galega. Os centros gañadores nas distintas modalidades recibirán unha asignación extraordinaria de 1.000 euros para melloras no laboratorio de radio ou para actividades relacionadas co funcionamento do mesmo, sempre vinculado á biblioteca do centro. Os podcasts premiados serán emitidos por esta emisora; á súa vez, serán difundidos a través da súa páxina web e da canle dixital do Diario Cultural.
O obxectivo do certame é estimular a elaboración de produtos radiofónicos por parte dos estudantes, enfocados a salientar a riqueza do patrimonio lingüístico galego, especialmente vinculados á lectura de poesía galega ou ao mundo do libro, da edición e da tradución.