«Meu pai tivo a idea das cabanas elevadas inspirándose nun galiñeiro»

O complexo de Outes está formado por medio cento de chozas elevadas a seis metros


ribeira / la voz

O Colexio de Arquitectos de España vén de situar a Outes no mapa estatal do deseño, concedéndolle a un dos seus negocios de aloxamento, as Cabanas de Albeida, o premio de Arquitectura 2020. As construcións forman parte dun complexo formado por sete parcelas nas que se distribúen medio cento de singulares chozas elevadas a uns seis metros do chan. Á fronte deste innovador e próspero modelo turístico, que no seu día foi pioneiro en Galicia, atópanse Manuel Lema e a súa filla Renata. É ela a que fai balance da intensa traxectoria da empresa e avanza tamén os plans de futuro.

-Unha traxectoria ascendente que parece non tocar teito aínda, cal é o segredo do éxito?

-Neste proxecto, o segredo do éxito é o turismo de proximidade, vender un produto que consiste nunha experiencia. É algo que funciona coa xente da contorna e con todos os grupos de idade, aínda que o noso público obxectivo son as parellas. O que ofrecemos é unha desconexión coa rutina en plena natureza e con todas as comodidades.

-Como xurdiu a idea das cabanas elevadas, que foron pioneiras en Galicia?

-Nós empezamos no sector do turismo no 2000, con casas rurais. Oito anos despois construímos as primeiras cabanas, pero no chan; as elevadas constitúen unha evolución froito de coñecer ao clientes. Meu pai tivo a idea das cabanas elevadas inspirándose nun galiñeiro da súa infancia, que estaba nunha árbore para evitar que o raposo comera as aves pola noite. No 2009, nunha visita a Brasil, volveu a ver que empregaban ese mesmo sistema para gardar as galiñas e viu claro que se podía adaptar ao sector turístico.

-Nesta traxectoria ascendente, cal foi o principal obstáculo?

-O máis difícil foi atopar o terreo axeitado, xa que no noso complexo, todas as cabanas están asociadas a unha árbore e elévanse uns seis metros, o máximo que permite a lexislación. Logo, ten que ser solo urbano de licenza directa. Cando empezamos perdemos dous anos de xestións porque acabaron denegándonos a licenza nunha parcela da nosa propiedade, pero que non era chan urbano.

-Cales son os principais atractivos que ofrecen as cabanas de Outes?

-O principal, durmir a seis metros de altura. A partir de aí, unha experiencia completo de contacto coa natureza para cargar pilas, con baño nocturno de hidromasaxe vendo as estrelas. Coidamos moito a localización de cada cabana, para que nunca se vexa unha desde outra, polo que a intimidade é total

-Hai enriba da mesa algún proxecto de expansión?

-Estamos cun proxecto novo para aquí para Outes, porque consideramos que é un municipio estupendo para a nosa idea de negocio. Tanto porque conserva a esencia do rural, con grandes superficies de plantas autóctonas, como pola súa localización estratéxica, a media hora de Santiago, unha da Coruña e 30 minutos máis de Vigo.

-Hai previsión de saír de Outes?

-Temos algúns contactos en Portugal, a onde nos gustaría chegar, e estamos estudando outras localizacións, pero todas fóra de Galicia. En Galicia, fóra de Outes, non temos interese en investir.

-Como está a afectar a pandemia a esa traxectoria ata o de agora ascendente das Cabanas de Outes?

-O certo é que nos sorprendeu a boa ocupación que tivemos tendo en conta as circunstancias. O verán foi como calquera outro. A caída brutal da ocupación chegou co peche perimetral de Outes. O covid fíxonos tomar unha serie de medidas que quedarán para sempre, servizos que fan que a estancia sexa segura, porque os clientes non teñen que ter contacto con ninguén.

-Como ve o futuro?

-Son optimista, se penso que este modelo de negocio non ten futuro, cal é o que pode funcionar? Penso que en canto se vaian levantando os peches perimetrias a xente volverá. Recoñezo que o ano pasado estaba máis preocupada, porque era unha situación nova, pero xa comprobamos que a xente volveu a viaxar e a consumir. Sairemos adiante.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
11 votos
Tags
Comentarios

«Meu pai tivo a idea das cabanas elevadas inspirándose nun galiñeiro»