Onofre Muianga: «É preciso quebrar barreiras e reforzar a idea de que o mundo é global»

O técnico de Finanzas veu pasar unha tempada en Galicia para tender pontes e compartir coñecementos


outes / corresponsal

Con todas as posibilidades que brinda o acceso á Rede hoxe en día, non hai mellor fonte de información que a de alguén que fai un relato en primeira persoa para mudar a nosa perspectiva. Así foi como Onofre Muianga, técnico municipal de Finanzas na Associaçao Nacional dos Municipios de Moçambique, aterrou en Outes hai unhas semanas, despois de pasar por Burela e Cabana, co gallo de participar no programa Vacacións con Traballo, promovido polo Fondo Galego de Cooperación e Solidariedade, e aportar unha nova visión sobre o seu país.

Durante a súa estadía tivo a oportunidade de coñecer o entorno, a cultura e a gastronomía da zona, unha experiencia que cualificou como moi positiva. Moi centrado no ámbito económico e na xestión de impostos municipais, Muianga estivo en contacto cos órgano de goberno, compartiu as problemáticas ás que se enfrontan os municipios mozambicanos nese eido e puxo en valor o sistema implantado nos concellos galegos.

Entre as causas da baixa recadación de impostos, recollidos nun estudo elaborado pola Associaçao dos Municipios de Moçambique, sinala a «falta dunha unidade de tributación, que non existe ou está en fase de consolidación. Tampouco existe un catastro tributario a nivel nacional, nin hai procesos unificados. O poder de compra das familias tamén pode afectar no proceso de pagamento dos impostos e existe unha cultura fiscal baixa. Noutros casos o custo de mantemento do material é moi elevado, e detectamos unha necesidade de profesionalización dos técnicos municipais».

Non só de economía foi a cousa, e tamén tivo tempo de sinalar algunhas similitudes entre os territorios, como é o caso das relacións interpersoais: «Mozambique e Galicia teñen relacións afectivas moi fortes, cun carácter moi aberto». En canto ás diferenzas apreciadas, Muianga sinalou a práctica inexistencia dunha organización xerárquica coas institucións municipais en Galicia, que cualifica como «moito máis fluídas, con menos trámites burocráticos e máis rápidas».

Outra das diferenzas das que falou foi o clima, moito máis cálido en Mozambique, e máis concretamente as augas. Onofre compartiu a súa experiencia visitando por primeira vez as frías augas que bañan as nosas costas, un feito que lle chamou moito a atención. «Eu aquí non fico», comentou tras meter os pés no mar.

Charla no instituto de Outes

Cun enorme sorriso e ganas de compartir experiencias comezou a charla que ofreceu o pasado mércores aos alumnos de terceiro curso da ESO do IES Poeta Añón (Outes), actividade programada polo Servizo de Normalización Lingüística do Concello e na que Onofre compartiu información sobre o seu país cos rapaces. O relato espertou o interese dos alumnos, que non dubidaron en facerlle todo tipo de preguntas moi enfocadas na situación económica e social do país: «As cuestións que propuxeron amosan o seu interese en Mozambique e a súa preocupación en cuestións de igualdade, calidade de vida, índice de pobreza e escolaridade».

Precisamente sobre igualdade, Muianga compartiu cos alumnos as mellorías que se están a experimentar nun país no que «as mulleres aos poucos están a amosar o seu potencial». En cuestión de recursos, observou que é necesario facer unha redistribución para mellorar a situación dos seus habitantes. Sobre esta xuntanza, destacou que «é preciso quebrar barreiras e reforzar a idea de que o mundo é unha aldea global».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Onofre Muianga: «É preciso quebrar barreiras e reforzar a idea de que o mundo é global»