Terra de Outes enxalzou a loita contra o fascismo do soldado de Catasueiro Manuel Otero

Tamén recoñeceu os méritos do soldado republicano o alcalde de Outes, Manuel González


outes / corresponsAl

O 75.º aniversario do pasamento do soldado de Catasueiro Manuel Otero, o único español que morreu durante a primeira xornada do desembarco na costa de Normandía, serviu para que Terra de Outes enxalzase a súa loita contra o fascismo. Nunha homenaxe realizada onte xunto ao monumento conmemorativo ás vítimas do franquismo en O Freixo, fíxose un repaso pola biografía deste veciño, que caeu en combate o 6 de xuño de 1944.

O presidente da entidade cultural Terra de Outes, Xoán Mariño, afirmou que Manuel Otero «sacrificou a súa vida e liberdade» combatendo no bando republicano dende o inicio da Guerra Civil e uníndose en 1943 á Big Red One americana.

Tamén participou no acto o membro da Comisión pola Recuperación da Memoria Histórica Xoán Hermida que, ao igual que fixo Xoán Mariño, desmentiu que Otero se tivese unido ao exército americano para obter a nacionalidade. Neste sentido, Xoán Hermida precisou: «Todo apunta a que o feito de que se alistase ten moito máis que ver cos motivos ideolóxicos da loita contra o fascismo».

Valores universais

Tamén recoñeceu os méritos do soldado republicano o alcalde de Outes, Manuel González, durante a súa intervención. Destacou a importancia da figura de Otero na defensa da liberdade e a democracia «que penso que son valores universais».

Ao mesmo tempo, González puxo de manifesto a situación política que se está a producir en Europa co auxe de «vellas pantasmas». Indicou que se están a recuperar discursos que deben combaterse con intelixencia.

O acto finalizou co descubrimento dunha placa conmemorativa en lembranza de Manuel Otero e cunha ofrenda floral.

Entre os asistentes á homenaxe estaba unha sobriña do soldado, María Dolores Martínez Otero, quen agradeceu a asistencia ao acto e o recoñecemento tributado ao seu parente.

Integrantes do grupo Jaitas Blues interpretaron o himno galego como colofón.

O presidente de Terra de Outes explicou que se decidiu facer a homenaxe de Manuel Otero o 17 de agosto, xornada na que se celebra o Día da Galiza Mártir e que coincide coa data do asasinato de Alexandre Bóveda a mans das forzas franquistas, pola súa simboloxía.

Neste senso, Xoán Mariño comentou aos presentes que durante o mes de agosto do ano 1936, a represión franquista na comunidade galega foi brutal.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Terra de Outes enxalzou a loita contra o fascismo do soldado de Catasueiro Manuel Otero