Cinco especialistas intervirán o día 17 nunha mesa redonda e Aurora Marco presentará un libro o 14
08 abr 2026 . Actualizado a las 05:00 h.O 25 de xullo de 1936, cando boa parte de Galicia estaba xa en mans dos militares fascistas e dos falanxistas, un hidroavión lanzou tres bombas sobre Noia para tratar de forzar a rendición da vila. Dous caeron sen estoupar na avenida de Galicia e no Campo da Feira, mentres que o terceiro estalou sobre a Casa da Agra. No 2015, o goberno local colocou tres placas nestes puntos, que co tempo foron eliminadas. Agora, coincidindo cos actos do Día da República, serán recolocadas, ao tempo que se lle renderá homenaxe a Maxi Olariaga polo seu labor en defensa dos valores republicanos.
O programa impulsado polo Concello arrancará este sábado (Coliseo Noela, 20.30 horas) coa representación da obra O mestre, escrita por Xosé Agrelo, a cargo da agrupación teatral O Xeito.
As actividades continuarán o 14 (casa da cultura, 20.30) coa presentación do libro María Vázquez, a mestra socialista eliminada polo franquismo, a cargo da autora, historiadora Aurora Marco.
Para o día 17 está prevista a celebración dunha mesa redonda sobre a II República, na que ofrecerán a súa visión Manuel Barreiro, doutor en Educación e especialista en divulgación pedagóxica da memoria; Antonieta Caramés, licenciada en Historia e técnica de Turismo; José Antonio Pérez, catedrático en Xeografía e autor de publicacións e traballos relacionados coa represión franquista; Sol Agra, deputada provincial de Memoria Histórica; e Joam Evans, doutos en Ciencias Sociais. O faladoiro, que se desenvolverá ás 20.30 no Casino, será moderado por Marta Lois, decana da Facultade de Ciencias Políticas.
A concelleira de Memoria Histórica, Chelo Martínez, destacou como obxectivos do programa poñer en valor os principios de liberdade, igualdade e xustiza.