Carla Places: Unha bailarina de Noia á conquista de Madrid

adriana quesada / m. x. b. RIBEIRA / LA VOZ

NOIA

CARMELA QUEIJEIRO

Con só 22 anos, a artista formada na academia Oitos integra o elenco do musical «Mamma Mía!»

31 jul 2022 . Actualizado a las 05:00 h.

«A danza é unha profesión estigmatizada, considerada o acompañamento dos que son erixidos como verdadeiros artistas», asegura Carla Places (Noia, 2000). Ela leva toda a súa vida bailando, dende que se apuntou á súa primeira clase na academia Oitos de Noia, sen saber o que remataría significando para ela aquel paso. «Con sete anos xa facía ballet e baile moderno», engade.

Regístrate gratis y recibe cada mañana en tu correo las principales noticias del día

A pesar de que, nun comezo, aquilo era tan só unha actividade extraescolar, rematou por «ir aumentando a carga horaria» e facéndose cada vez máis propensa a pasar horas nos adestramentos. Naquel momento xa tiña un obxectivo: aprobar os exames de nivel que a asociación Acade facía en Madrid anualmente. Pero todo tomou un ton máis serio cando, no 2018, viuse ca responsabilidade de escoller cales serían os seus estudos: «Non tiña nin idea de que facer coa miña vida».

Para ela foi moi importante a orientación da súa profesora de danza, Verónica, e o apoio dos seus pais «que ao final é algo que non todo o mundo ten». Desa forma, despois de charlar co bailarín dun espectáculo ao que asistiu, decidiu mudarse a Madrid para estudar danza. «É que hai que ter en conta que eu, ata ese momento, non tiña nin idea de que existía a posibilidade de rematar traballando en algo tan incrible», asegura.

En Madrid dedicábase, durante as mañás, a asistir á academia de danza, mentres que pola tarde estudaba a carreira de maxisterio: «Había días que remataba desfeita, era imposible». Non obstante, é consciente de que o estilo de vida dos bailaríns é moi acelerado e «ao mellor nun futuro quero ter unha familia e se estou viaxando tódalas semanas non podo facelo». Ademais de que unha lesión pode obrigala a deixar a danza.

Os seus traballos

Durante o ano pasado, Carla Places comezou a facer pequenos traballos: «Movinme un pouco polo ámbito laboral». Un dos seus primeiros logros no mundo profesional foi ser unha das bailarinas do corpo de baile que participou nos premios Forqué e colaborar nunha película.

Non obstante, neste momento destaca que é parte do elenco do musical Mamma Mía!. «Sempre gocei dos musicais, cando os vía de pequena soñaba con ser parte dun», asegura. É por este motivo que se presentou á audición desta peza, «aínda que estaba segura de que non me ían coller porque non depende de como baile, senón que a este nivel interveñen moitos máis factores».

Despois de pasar as probas de baile tamén foi ás de canto: «Paseino mal, porque eu non canto, eu son bailarina». Non obstante, a pesar de que non o esperaba, rematou sendo escollida como parte do elenco: «Agora o reto que teño é non lesionarme, divertirme e aprender a cantar».

Sacrificio

Durante a súa formación, Carla asistía a clases de danza dende as 9.30 ata as 15.00 horas, «e no último ano sumáronlle dúas máis». Cada día adestrábase en danza clásica, contemporánea e jazz, o que supón unha gran fatiga. «Para ser bailarín hai que ter constancia e disciplina, non podes pensar moito no cansado que estás», comenta.

Para ela, no momento no que un se converte en bailarín é consciente de que terá días de maior cansazo físico, pero que non pode rexeitar os adestramentos e debe seguir aprendendo. «Os estilos de baile evolucionan e o corpo cambia, hai que estar en constante aprendizaxe», asegura. Por este motivo pensa seguir formándose e adquirindo coñecementos dos seus compañeiros, «que son xente moi recoñecida e con moito traballo detrás».

Para Carla Places, a danza non é só unha forma de expresión, senón que «tamén é un traballo». A pesar de que está moi orgullosa de ser quen de saír adiante sendo bailarina, admite que a xente aínda non entende que a súa profesión é tan digna coma calquera outra: «Nótase moito cando estou a buscar piso e descobren que son bailarina, pensan que por iso xa non vou a pagar o aluguer».

A pesar de que moita xente asocia a danza a unha disciplina artística e a parte do mundo cultural, ela considera que aínda falta bastante por percorrer. Escoita á xente sinalala «como se o único oficio ao que pode acceder unha bailarina fora de carácter sexual».