Santiago Freire: «Gustaríame un goberno máis colaborativo, pero á parte diso, fixemos grandes logros»

Marta Gómez NOIA / LA VOZ

NOIA

MARCOS CREO

O rexedor noiés encara a recta final dun mandato inesperadamente complexo

01 may 2022 . Actualizado a las 05:05 h.

Parafraseando a Feijoo co seu «Galicia, Galicia, Galicia», no caso de Santiago Freire podería dicirse que na súa cabeza só cabe unha cousa: Noia, Noia, Noia. O alcalde noiés é consciente de que o ano que queda por diante ata as próximas eleccións municipais pode ser decisivo para que repita no cargo, pero iso non o desvía das súas prioridades: «Vou dedicar todo o tempo e esforzo a seguir conseguindo investimentos e actuacións para o Concello». Está satisfeito do traballo feito ata o momento e espera que, chegada a hora da cita coas urnas, os veciños o valoren.

—Achégase o final dun mandato ben estraño...

—Vanse cumprir tres anos de mandato e é inevitable facer referencia a unha situación de pandemia que afectou a gran parte deste período e que está a ter unhas consecuencias a posteriori que aínda seguiremos arrastrando uns meses. Foi unha situación nova e imprevista na que houbo que ir adaptándose sobre a marcha, pero, honestamente, creo que saímos bastante airosos.

—Entramos en ano electoral, e por experiencia é sabido que conforme se acercan as eleccións empezan a aparecer as présas por facer obras, que actuacións teñen apuro en Noia?

—No noso caso, creo que en todos os ámbitos fixéronse xa actuacións importantes, ben con recursos propios ou a través de xestións con outras Administracións. Falo de cousas reais e tanxibles, que están aí para ver. Por exemplo, fixéronse importantes investimentos de apoio a sectores estratéxicos como marisqueo, un dos piares da nosa economía, coas melloras realizadas tanto na lonxa como nos pantaláns e na explanada portuaria de Testal. Contando coas melloras ambientais realizadas na contorna, aí gastáronse máis de dous millóns de euros. Deuse apoio tamén á hostalería e o comercio local, con novas campañas que favoreceron a afluencia de visitantes á vila. No eido educativo, ampliáronse e reforzáronse os servizos de conciliación, e en melloras nos centros fixéronse nesta etapa investimentos que superan os tres millóns de euros. Noia era unha vila que tiña moitos aspectos a mellorar en canto a vías e beirarrúas en mal estado, seguen quedando cuestións pendentes, pero fíxose un gran traballo que calquera pode comprobar.

—En calquera caso, haberá actuacións prioritarias que queira sacar adiante no ano que queda.

—Unha obra moi importante e moi necesaria é a nova glorieta do cruce da Barquiña, na que se van investir aproximadamente 1,15 millóns de euros, e está tamén en licitación a mellora da ponte de Ceilán. Están comprometidos máis de 200.000 euros para a reforma e mellora do edificio do xulgado e, aínda que tardará un tempo en verse materializado, vaise avanzando no novo centro de saúde.

—É consciente de que haberá quen retruque que todos eses investimentos veñen doutras Administracións.

—A previsión de investimentos do Concello de Noia foi medrando ano tras ano, grazas, en boa medida, á consecución de fondos doutras Administracións, si, pero iso lógrase a base de pedir e de xestionar. Esta etapa caracterízase por manter unha boa relación coa Xunta, fundamentalmente, pero tamén coa Deputación e incluso con Costas do Estado, o que se materializou en actuacións de calado.

—Neste mandato afloraron certas discrepancias no seo do bipartito, en que punto está a relación do goberno?

—A min gustaríame que fose un modelo de goberno máis colaborativo, pero, á parte diso fixemos grandes logros e hai un volume importante de investimentos executados. Espero que os veciños saiban valoralo.

—Repetiría experiencia?

—Queda un ano por diante, entendo que cando falten unhas semanas para as eleccións será cando haxa que facer unha valoración seria, pero hoxe por hoxe é moi precipitado facer unha previsión do resultado e de posibles alianzas ou estratexias.

«Determinadas accións poden ter un custe electoral»

Como apunta Santiago Freire, é imposible facer un balance do actual mandato obviando a incidencia que tivo a pandemia na xestión municipal. Foi unha época complicada que o rexedor noiés confía que estea superada.

—Como afectou a pandemia á labor de goberno? Lastrou o seu plan de acción?

—Indubidablemente. Tivo incidencia no aspecto económico, no organizativo e incluso desde o punto de vista da xestión administrativa. Determinadas accións poden ter un custe electoral e consecuencias políticas serias se non se actúa con rigor.

—Fala de custe electoral, cre que a vostedes lles pasará factura esta situación?

—Entendo que non, espero que non. Creo que en todo momento nos fomos adaptando ás circunstancias e participamos dos distintos plans de rescate que puxeron en marcha as Administracións, algo que non todos os concellos fixeron. Tamén formamos unha comisión de seguimento municipal na que estiveron representados todos os grupos, que tiveron oportunidade de facer achegas e de participar na toma de decisións. Tamén puxemos en marcha os kits de arranque para a reapertura de comercios e negocios despois do confinamento, e flexibilizamos a instalación de terrazas para que os establecementos hostaleiros puideran traballar.

—O prioritario naquel momento era reactivar a actividade económica...

—Non só iso, tamén se adoptaron medidas para a veciñanza en xeral. Por exemplo, permitiuse o aprazamento e o fraccionamento do pago de determinadas taxas municipais, para dar as maiores facilidades posibles. Neste sentido, creo que se incidiu nos distintos aspectos e sectores afectados pola pandemia e que se actuou con rigor. Creo que estivemos á altura dentro de que estabamos ante unha situación imprevista totalmente descoñecida para todos.

Santiago Freire se brinda «a todo o que queira facer unha Noia mellor»

Marta Gómez

El PP y el NOIA ratificaron en el pleno de investidura su acuerdo para gobernar mano a mano el municipio noiés durante los próximos cuatro años. No hubo lugar a la sorpresa y Santiago Freire salió elegido alcalde, iniciando su segundo mandato, en el que brindó su colaboración a los demás grupos y a «todo o que queira facer unha Noia mellor».

Los aplausos del público que abarrotó el salón de plenos recibieron a los concejales electos a medida que entraban en el salón noble, pero la gran ovación quedó para el final, con Freire ya investido mostrando el bastón de mando que le pertenecerá durante los próximos cuatro años. Ningún portavoz de los demás grupos quiso intervenir tras la votación, así que fue el recién elegido alcalde el que tomó la palabra para agradecer la confianza depositada en él: «É unha honra e un orgullo persoal e colectivo para os que imos asumir a tarefa de gobernar. Sinto unha gran satisfacción, pero tamén unha enorme responsabilidade».

Seguir leyendo