Manuel Blanco Ons: «Con catro escrituras é imposible sosterte»

Os letrados son o colectivo máis prexudicado ante a falta de xuízos e de sentenzas


Ribeira / la voz

A súa longa traxectoria fala por el. Manuel Blanco Ons é un dos avogados afectados pola folga posta en marcha hai cinco semanas polos funcionarios galegos de Xustiza. A repercusión sobre o seu traballo, ao igual que para os seus compañeiros, é total. De non desbloquearse, afirma, a ameaza sobre o modo de vida de moitos deles comezaría a ser realmente preocupante.

-¿A folga é tan prexudicial como se está comentando?

-A afectación é total, vivimos nunha parálise absoluta. Non se está celebrando nada, está toda a Administración bloqueada. Na comarca acontece o mesmo. A demora nos trámites é brutal. No referente ás demandas presentadas, non se fai nada, quedan directamente bloqueadas.

-¿Cómo lle afecta este parón á cidadanía en xeral?

-Calquera folga que afecte a un servizo fundamental é prexudicial. Neste caso vaise a pagar durante moito tempo. Se por exemplo fose no sector da Sanidade, esta xa tería terminado, porque é moito máis evidente para todos. No caso da Xustiza é máis complexo, porque é algo que non se ve con tanta facilidade. Por agora aínda non se é consciente da transcendencia e isto repercute sobre todos, tanto nos avogados coma nos veciños.

-O colectivo dos letrados é un dos máis prexudicados.

-Se non temos xuízos nós non percibimos honorarios. Cae o noso medio de vida, con catro escrituras é imposible sosterte. Ao final parece que somos os avogados e os procuradores os que peor parados saímos, aínda que non esteamos implicados directamente.

-¿Como cre que se pode desbloquear este conflito?

-Non sei cal é a solución correcta. Non me poño de ningunha das dúas partes, pero o que está claro é que ao mellor o máis axeitado está nun termo intermedio.

-¿A que tarefas se están dedicando actualmente?

-Estamos facendo trámites extraprocesais, reunímonos con clientes para tratar dunha forma máis pausada os seus casos e intentamos axilizar negociacións que ían lentas. Hai moito traballo oculto que sacamos adiante, pero estamos preocupados por coñecer como vai a rematar isto.

-¿Teñen algún cliente ao que lle afectase a folga directamente?

-Estamos á espera de que nos notifiquen unhas seis sentenzas. Sen embargo, hai xente que ten unhas indemnizacións no xulgado que non pode recoller.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Tags
Comentarios

Manuel Blanco Ons: «Con catro escrituras é imposible sosterte»