Os topónimos Pé de Requeixo (Serres, Muros) e As Requeixadas (Caamaño, Porto do Son) derivan do substantivo requeixo «parte pendente dun terreo elevado que remata en vagoada» moi abondoso no noso territorio.
Este termo podería explicarse talvez como feminino da voz requeixado, termo arcaico que, segundo Aníbal Otero, designaba «uma terra, localidade pequena ou despovoada».
Pola súa parte, Edelmiro Bascuas apunta o hidrónimo medieval Recasio e, a partir deste dato, supón que requeixo entroncaría co mesmo tema *rek- que explica o termo rego e derivados, engadíndoselle un sufixo -asio ben coñecido en formacións como Arteixo, Abeixón ou Dobreixa.
As dificultades fonéticas implícitas no mantemento da consoante xorda [k], no canto da súa esperábel sonorización, solventaríanse á luz da existencia de dobretes como Recatelo / Regatelo e similares.