Agustín González Dosil: «O reto é difícil, pero eu confío na xente do meu concello»

O candidato popular en Carnota ten un reto dobremente complicado: recuperar o goberno municipal e recompoñer a agrupación local


Ribeira / La Voz

Nun escenario de candidatos máis que asentados, a que polo momento é a única cara nova entre os aspirantes do PP ás alcaldías da zona ten un reto dobremente complicado: recuperar o goberno de Carnota e recompoñer a agrupación local. A pesar de que acaba de chegar á política, Agustín González Dosil é plenamente consciente do que lle queda por diante para intentar cumprir as expectativas depositadas nel, pero tamén de que o segredo do éxito está en sentar unhas bases sólidas.

-¿Que fixo que se animara a ser nada menos que o cabeza de lista do PP?

-Sempre estiven en contacto coa xente do partido e animoume a dar o paso a dirección provincial. Propuxéronmo despois de estar agardando a que alguén se presentara a unhas primarias, pero non se postulou ninguén. Isto quedou desfeito despois das últimas eleccións.

-Daquela ten unha complicada tarefa por diante.

-Si, o reto é complicado. Estamos facendo un equipo con xente nova, moi motivada, e tamén contamos con persoas que xa estaban no partido e que queren seguir colaborando. Aínda que o certo é que a xente segue estando moi desanimada, pola política en xeral, por todo o que se ve na televisión... Pero a nivel local eu creo que o máis importante é o factor humano, é imprescindible, e creo que vai influír máis iso na xente que o propio partido co que te presentes. Está claro que hai votos que xa os tes, pero ao resto telos que conquistar.

-¿Con que obxectivo se presentará ás eleccións?

-O obxectivo principal sempre é gañar a alcaldía, claro, pero xa se verá. O PP baixou moito nas últimas eleccións, a xente foise desanimando e temos que empezar pouco a pouco, esperamos conseguir ilusionar de novo.

-¿Xa está definido o plan de campaña para conseguilo?

-Agora mesmo estamos traballando o equipo, temos que ir agrandando a nosa base, ese é o obxectivo máis inmediato, logo xa pensaremos na estratexia da campaña. O fundamental é ter unha base sólida, e necesitamos xente que queira colaborar e que teña ilusión. O resto xa o iremos definindo. O traballo de percorrer as parroquias na campaña haino que facer, pero non creo que eses 15 días sexan determinantes para conseguir votos. O que penso é que a campaña serve para aclararlle certas cousas á xente, responder ás súas dúbidas, e non podes mentir porque perderás a súa confianza. Se dis algo, se chegas á alcaldía tes que cumprilo, esa é a función do alcalde, a de servir.

-De momento, é a única cara nova entre os candidatos do PP na comarca, ¿danlle consellos os seus compañeiros?

-Algún si, pero sobre todo danme ánimo, saben que a miña situación é complicada. É certo que o reto é difícil, pero eu confío na xente do meu concello.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Tags
Comentarios

Agustín González Dosil: «O reto é difícil, pero eu confío na xente do meu concello»