Alonso Caxade: «Neste vídeo, Carnota queda retratada como un auténtico paraíso natural»

Aínda que non naceu tocando, ben podería parecer, porque desde moi pequeno Alonso Caxade amosou unha destreza especial por sacar notas musicais de todo tipo de instrumentos, a pesar de que ten especial predilección polo acordeón. Toda esta traxectoria valeulle para ser elixido para compoñer a banda sonora da nova campaña publicitaria do Concello de Carnota.

-¿Como xurdiu este proxecto?

-Curiosamente, o vídeo fíxoo unha empresa que se chama Aba Films, coa que eu colaborara de maneira esporádica na gravación dun programa hai varios anos. Sempre quedou a promesa de que tiñamos que facer algo xuntos e, cando xurdiu a oportunidade, chamáronme. Tamén é certo que Carnota é un Concello que andaba detrás da música de Caxade desde hai tempo, que quería levarnos a tocar aí, e este ano déronse as dúas cousas ben: imos ter un concerto en Carnota e fixen a música para o vídeo.

-¿Coñecía Carnota?

-Si que o coñecía, non porque pasara moito tempo, pero eu traballei nunha escola de Fisterra dous anos e, como ía e viña, Carnota era un deses sitios nos que, cando tiña un pouco máis de tempo, facía unha excursión e ía a dar unha voltiña pequena.

-¿En que se inspirou para a banda sonora desta campaña de promoción?

-Eu traballei sobre o vídeo practicamente definitivo, cando apenas só o vira a corporación e pouco máis. Neste vídeo aparecen imaxes espectaculares e, aínda que eu coñezo Carnota, a verdade é que me sorprendeu. É certo que calquera imaxe aérea de Galicia conquista. Neste vídeo, Carnota queda retratada como un auténtico paraíso natural; un lugar que todo o mundo debería visitar. O que fixen con esas imaxes, e aproveitando que me deron carta branca, foi poñerlles música cun estilo minimalista entre o indie, o folk e o pop, cun toque bucólico que penso que lle queda moi ben, utilizando os instrumentos habituais de trompeta, trombón, batería, acordeón, violín.

-A pesar de que é acordeonista, tamén toca outro tipo de instrumentos.

-Si, con algúns con máis soltura que con outros [risas]. Son gaiteiro desde que teño uso de razón, ou desde antes. Estou conectado coa música tradicional desde sempre, e coa máis formal ou máis clásica a través do conservatorio onde estudei acordeón. E logo sempre me interesou moito o mundo das bandas de música. Ademais, estudei bombardino, sei algo de trombón, e ando rascando un pouco en todos os instrumentos de vento e metal.

-¿En que proxectos anda metido agora?

-Xustamente, o pasado venres acaba de estrearse a obra Casa o rei, de Ibuprofeno Teatro, á que lle fixen a banda sonora, e este traballo tívome ocupado moito tempo, incluso coincidindo co encargo do vídeo de Carnota. A verdade é que estou no medio da allada entre compoñer músicas para outras persoas, que non é algo moi habitual para min. Eu sigo sendo máis músico de directo que de estudio, pero compoñer tamén é algo que me apetece. Sobre todo para o proxecto de Carnota, que é un concello pequeno que está apostando moito por innovar cunha proposta visual clara, e así quedou demostrado na presentación doutro día.

-¿Como se presenta o verán?

-Moi ben, temos varias datas xa pechadas para os próximos meses. O concerto de Carnota será o 31 de marzo, e logo tamén estaremos en Boiro, Cervo, Carballo e Negreira. No verán tamén iremos de xira cunhas 15 ou 20 actuacións.

-¿Hai previsión de gravar disco?

-Si, esa previsión está en mente. A miña idea é sacalo o próximo inverno. A verdade é que a xira de presentación do último disco foi interrompida polos proxectos das bandas sonoras. Agora retomamos esa xira e, despois do verán, comezaremos co novo traballo.

---

---

---