Panorama, París de Noia e Satélites encabezan un cartel de actuacións que reúne algunhas das formacións máis destacadas no que respecta a animación das festas galegas
04 jul 2026 . Actualizado a las 19:35 h.s verbenas volverán ser un ano máis un dos grandes motores das Festas do Verán de Boiro. Fieis a unha tradición profundamente arraigada en Galicia, as celebracións apostan nesta edición por algunhas das formacións máis destacadas do panorama galego, convertendo a praza de Galicia no principal escenario dunha programación pensada para atraer públicos de todas as idades. Música en directo, espectáculo e centos de cancións coñecidas volverán marcar o ritmo de varias noites chamadas a reunir milleiros de persoas.
O cartel reúne nomes de referencia dentro do mundo da verbena galega, con formacións que levan décadas enchendo prazas e festas patronais na comunidade. Entre elas destacan Panorama, París de Noia e Satélites, tres das orquestras con maior capacidade de convocatoria.
A máis agardada por moitos afeccionados será, un ano máis, Panorama. A formación destaca pola combinación de música, baile, efectos visuais e unha espectacular posta en escena, unha fórmula que a converteu nun dos grandes fenómenos das festas galegas. A súa presenza é sinónimo de grandes afluencias de público e Boiro non será unha excepción. A orquestra actuará durante a gran noite de peche, compartindo cartel con outras dúas formacións de prestixio como Los Satélites ou América de Vigo.
Outra das citas sinaladas será a actuación da París de Noia. Cunha traxectoria que a converteu nunha das orquestras máis recoñecidas de Galicia, mantén intacta a súa capacidade para congregar públicos de todas as idades. O seu amplo repertorio, capaz de combinar clásicos de sempre cos éxitos máis actuais, e unha coidada posta en escena explican boa parte dun éxito que se prolonga desde hai décadas.
A programación complétase coa presenza doutras formacións moi coñecidas do circuíto festivo galego, como Marbella, Gran Parada, Origen ou La Oca Band, encargadas de manter o ambiente ao longo de toda a semana. A elas súmanse Finisterre Project, Capitol e Suavecito, configurando un cartel variado no que teñen cabida diferentes estilos e formatos.
O resultado é unha aposta decidida por un dos elementos máis característicos das celebracións populares galegas. Porque, máis alá dos escenarios e dos espectáculos, as orquestras continúan a ser unha parte fundamental da identidade festiva do país. E en Boiro volverán demostrar por que seguen a reunir cada verán milleiros de persoas arredor da música.