O BNG de Boiro rexeitou entrar no novo equipo de goberno por «coherencia política»

Aínda que tanto ideoloxicamente como polo entendemento que houbo nestes últimos anos, parecería que o BNG era o que máis posibilidades tiña de formar equipo de goberno co PSOE en Boiro, esta alianza non se acadou, e os nacionalistas decidiron rexeitar o pacto «por coherencia política. Non podemos formar parte dun goberno no que agora van estar persoas que ata ben pouco optaban por negociar unha moción de censura que lle dera a alcaldía novamente á dereita», explicou Raquel Suárez en clara referencia a Carlos Rodríguez Muñiz, que acaba de abandonar Ciudadanos, o partido co que concorreu ás eleccións.

Neste sentido, a portavoz do Bloque recoñece que «a mera renuncia a unha siglas non pode ser considerado como un cambio ideolóxico repentino». Tamén aludiu á actuación de Dores Torrado (Boiro Novo) nestes últimos meses. «Parece que agora está de moda a palabra desbloquear porque se firmou un pacto», apuntou Suárez, para logo lembrar que «para contribuír á gobernabilidade do noso concello non é preciso formar parte dun goberno fronte a aqueles e aquelas que levan tempo obstaculizando calquera actuación».

Apoio puntual

O novo tripartito de Boiro só suma sete concelleiros, polo que precisará do respaldo dos nacionalistas para sacar os seus proxectos adiante. O BNG xa anunciou que o seu apoio será puntual, seguindo os principios de coherencia que marcaron ata agora a súa actuación.

Desta forma, os presupostos elaborados polo executivo poderían saír adiante, posto que o Bloque foi o único que votou a favor, sempre que «se respecten as nosas propostas e manteñan as mesmas directrices».

---

---

---