Pablo Bugallo: «A decisión de xogar en Superliga foi positiva para o club e para Boiro»

Formado na Cachada e convertido nun dos nomes propios do voleibol nacional, enfróntase por primeira vez ao equipo que o veu nacer


Pablo Bugallo (Boiro, 1991) medirase este sábado, ás 18.30 horas, co equipo no que descubriu e se formou no voleibol. Convertido nun dos nomes propios desta disciplina en España, o barbancés explica o que espera deste curso. Tamén aproveita para recoñecer unha máxima: Non será sinxelo derrotar ao Rotogal.

-Quen lle diría fai nada que se enfrontaría ao Rotogal en Superliga. Como espera o encontro?

-É un partido que tiña marcado no calendario. Aínda que máis especial será o do 27 de febreiro, que é cando vamos nós alá. E por enriba, coincide co aniversario do meu pai. O certo é que Boiro está facendo unha boa campaña. Seguín o partido contra o Palma cando estábamos en Melilla e non gañaron por uns puntiños.

-Non está mal para ser o seu primeiro ano na liga.

-Estanlle dando sustos a grandes equipos e tamén a outros que levan máis tempo na competición. É digno de resaltar. Están facendo as cousas ben. A decisión de xogar en Superliga foi positiva para o club e para Boiro, e tamén para os afeccionados.

-A vós tampouco vos está indo nada mal.

-Si, sacando a derrota que tivemos en Lugo hai un par de semanas, estamos tendo un dos mellores arranques da historia do club. Fixemos sete vitorias seguidas, sen ceder un só set, e gañamos a Supercopa. E hai un dato máis, na casa levamos 24 vitorias consecutivas. A verdade é que vamos moi ben.

-Que se prepare o Boiro entón...

-O noso é un pavillón complicado, levamos una boa racha e temos un gran equipo, pero cada encontro é un mundo. Non hai que desmerecer a ninguén, estea onde estea na táboa, sexa de primeiro, na metade ou contra o final.

-E as súas sensacións que tal?

-A verdade é que moi ben. Comecei un pouco máis tarde que o resto, pero conseguín coller o ritmo e estou xogando todo, con bos números nos últimos encontros, sobre todo no bloqueo. Pero queda moita tempada por diante. Imos pasiño a pasiño.

-Que metas se pon o Teruel?

-Queremos loitar por tódolos títulos. O equipo está funcionando, gañamos a Supercopa e queremos rematar esta volta como líderes. Logo hai que pensar na Copa del Rey. Pero, o que digo, vamos pasiño a pasiño.

-Como se espera ao Boiro?

-Será duro, o Boiro chega a unha cancha histórica e terá ganas de demostrar que o está facendo mellor ca ben. A pesar de non poder contar coa nosa afección, trataremos de facer un partido bonito.

-Non é o mesmo sen público...

-A xente víveo moito. A verdade é que o público dálle emoción aos partidos. Bótase de menos ese sétimo ou decimoterceiro xogador que che da un empurrón.

-Este curso converteuse nun dos máximos anotadores do Teruel e nun dos xogadores con máis partidos disputados na historia da entidade.

-Si, é certo, pero non son moito de estatísticas. Prefiro xogar e cando chegue, que chegue. A verdade é que se valora, pero non é algo que me obsesione.

-Mañá pasarán outra PCR.

-Estamos confinados logo de que un xogador de Melilla dera positivo. Xa pasamos unha proba e demos negativo, pero decidimos illarnos para evitar riscos. Mañá pasaremos outra e si non hai problema, iremos a adestrar. Senón tocará tomar medidas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Pablo Bugallo: «A decisión de xogar en Superliga foi positiva para o club e para Boiro»