Barbantia abre o curso con Elisabeth Oliveira e Agustín Agra

A asociación prevé festexar en Boiro o Día das Letras Galegas


Despois do parón estival, Barbantia volve á actividade para seguir ofrecéndolle aos barbanceses a posibilidade de descubrir as estreas editoriais. Regresa da man de Eslisabeth Oliveira, unha escritora de pais portugueses nacida en Francia, e de Agustín Agra, un mestre noiés que volve á narrativa galega despois de cinco anos de silencio editorial.

Oliveira desembarcará estar tarde en Ribeira (centro cultural Lustres Rivas, 20.30 horas) para presentar Náufragas no mar e na terra, un poemario que busca reivindicar a xustiza e a igualdade. A escritora estará arroupada pola concelleira de Cultura, María Sampedro, e polos membros de Barbantia Encarna Pego e Antonio Piñeiro.

O 25 será o autor barbancés Agustín Agra o que volva a reencontrarse cos lectores da man da asociación cultural. Regresa ao eido narrativo estreándose coa editorial Galaxia para ofrecer un monllo de relatos centrados na natureza humana e tamén na orgánica. Coma se dun caderno de campo se tratara, o noiés analiza en Silencio os tempos e os espazos.

A presentación do libro terá lugar no coliseo Noela, onde acompañarán ao escritor Antonio Piñeiro e María Xesús Blanco, en representación de Barbantia, e Francisco Castro, de Galaxia.

A asociación cultural tamén está a preparar xa a celebración do Día das Letras Galegas, que este ano foi aprazada para o 31 de outubro por mor do coronavirus. A idea é levar a cabo unha serie de actividades en Boiro, no pazo de Goiáns ou no parque de A Cachada, pero aínda están sen concretar, á espera de determinar o que é factible organizar tendo en conta as restricións vixentes.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Barbantia abre o curso con Elisabeth Oliveira e Agustín Agra