Por segundo ano, os callos serán os protagonistas da xornada dominical
08 dic 2018 . Actualizado a las 05:00 h.A tradición da devoción á patroa é o fío condutor dunhas celebracións de Santa Baia que, con todo, están abertas á incorporación de novos costumes co obxectivo de que acaben por consolidarse e para converterse nunha cita ineludible na programación de inverno boirense. Para conseguir iso, é necesario ir cociñando a nova tradición a fogo lento, igual que os callos que mañá se servirán no marco da segunda edición da festa gastronómica.
Nos primeiros anos de vida dunha nova cita festiva é difícil prever o resultado, pero a festa dos callos do ano pasado tivo unha boa acollida por parte dos veciños de Boiro, así que mañá haberá unha segunda edición na que está previsto servir máis racións que na primeira. Os responsables de organizala levan xa uns días traballando para preparar entre 1.000 e 1.500 pratos con abundantes garavanzos, carne e pata a fartar, que se cociñarán a fogo lento durante arredor de catro horas.
A xornada para os encargados da cociña empezará ben cedo, xa que está previsto comezar a servir as racións arredor das once da mañá, e só queda agardar que o bo tempo acompañe durante a celebración. Explican os responsables da organización que as condicións meteorolóxicas son claves para o éxito dunha cita destas características.
Actuacións musicais
Ademais da comida, a comisión de festas preveu unha serie de actividades para garantir a afluencia de veciños e visitantes para gozar da festa dos callos. Unha parte fundamental da celebración será a música, que comezará desde primeira hora coa animación da charanga Mil.9, mentres que á unha da tarde está previsto o comezo da actuación do grupo A Tajea.
Haberá mesas dispostas para a degustación, pero aqueles que prefiran comer na súa casa máis comodamente poderán pedir as súas racións para levar e deste xeito gozar dos actos festivos sen ter que preocuparse por cociñar.
Os callos serán o prato forte do día previo á celebración da onomástica da patroa propiamente dita. Santa Baia venerarase mañá cunha alborada a cargo dos grupos Arume e Brisas do Ulla e dúas misas, ás 12.00 e ás 20.00 horas, que irán seguidas das tradicionais procesións.
Serán os primeiros desfiles deste ano, que se repetirán nas xornadas sucesivas, dedicadas a distintos santos. As súas imaxes levan xa uns días colocadas no seu lugar e preparadas para saír en procesión arroupadas polos fieis que queiran acompañalas.
Churrasco e tortilla servirán de acompañamento ao prato principal
Aínda que, obviamente, os garavanzos serán o prato principal na festa dos callos, haberá outras opcións que servirán de acompañamento e que ofrecen unha alternativa para os que gusten doutro tipo de pratos. Churrasco, empanadas e tortilla serán os outros produtos que poderán mercarse durante a degustación.
A celebración gastronómica serve para contribuír a financiar os gastos das celebracións de Santa Baia, pero o máis importante é a participación dos veciños, por iso se fixaron prezos populares para os pratos. A ración de callos con pan, por exemplo, servirase a seis euros.
Para os cativos
Aínda que a cociña abrirá ás once da mañá, non ten horario de peche, e co fin de alongar a reunión en torno á comida os organizadores dos festexos contarán con preto dunha decena de grupos musicais que, a partir das catro da tarde, participarán nun serán.
Ademais, pensando nos máis cativos, haberá un inchable ao que poderán acceder gratuitamente.