«A ninguén sorprendemos se dicimos que unha bolsa de plástico tarda cinco xeracións en desfacerse e se o plástico é consistente, multiplícase de forma exponencial»
12 abr 2022 . Actualizado a las 05:00 h.A ninguén sorprendemos se dicimos que unha bolsa de plástico tarda cinco xeracións en desfacerse e se o plástico é consistente, multiplícase de forma exponencial. Dende que é de dominio público xorden voces que din que hai que reducilo, pero pouco avanzamos, porque aínda que nós sexamos conscientes, o mercado non o respecta. Moitos xa van á compra con carriño da casa, moitos levan bolsa comprada, pero moitos saen coa bolsa do súper, pagando un módico prezo, que non é motivo para rexeitala.
Con todo, se collemos froita ou legumes, métennolas en plásticos que non reutilizamos. Se miramos nos andeis, o 95 % dos produtos veñen en plásticos, e algúns incluso en dúas bolsas —pensemos unha bolsa de madalenas con envase individual—.
O caso é que cada vez que botamos ao colector a nosa bolsa de lixo —a diario incluso— vai chea de outras bolsas, moitas das cales é imposible volver a usar. Cando facemos unha festa, miles de persoas fan botellón deixando milleiros de bolsas ciscadas no chan. Agora descubrimos que embotellar en plástico pode ser canceríxeno.
O caso é que o plástico é un dos mellores inventos da humanidade, dende que no ano 1860 se utilizou para substituír o marfil nas bolas de billar nos Estados Unidos. Foi na contorna de 1960 cando se popularizou, e a súa actual xeneralización cáusanos un problema. É certo que xa hai mercados que fabrican outros produtos con plásticos reciclados, que á súa vez acabarán no lixo, pero o camiño debe pasar tamén por reducir, xa que o lema de o que contamina, paga xa non é un problema para nós.