Negacionistas ilustrados

josé vicente domínguez LATITUD 42°-34?, 8 N

BARBANZA

02 dic 2021 . Actualizado a las 05:00 h.

N o mes de xullo pasado escribín acerca dos negacionistas, aínda que daquela, non pensei que existisen tantos e tan culpables de seguir transmitindo o covid. Pero xa se sabe que nesta viña del señor sempre houbo uvas brancas e máis tintas.

Se hoxe me vexo obrigado a repetir tema é polo artigo que me atopei a pasada semana nas páxina dun suplemento de recoñecido prestixio, asinado por un persoeiro que, inconsciente das súas limitacións, tentaba facerse pasar por ilustrado en materias moi afastadas para o seu intelecto. Desgraciadamente, o paisano ten certa influencia sobre algunhas persoas por aquilo do seu meritorio polifacetismo. E a min, dáme pena pensar que as súas indubidables condicións artísticas noutros eidos, queden soterradas pola súa postura antivacinas. Pena tamén, porque ese individuo estase a converter nunha triste atracción social pola reiterada teima de desacreditar toda canta novidade non atopa xustificación no seu intelecto. En palabras dun amigo, «deulle por doutorarse no contrario da viceversa», que xa son ganas. Pero e verdade que pouco ou nada me preocuparía tan estrafalaria conduta, de non ser pola influencia que pode ter nun grupiño de seguidores e a conseguinte transmisión de ideas tan gravemente prexudiciais para a saúde.

Tamén, na pasada semana, saíron os resultados dunha enquisa sobre as características principais dos negacionistas das vacinas, e que son as seguintes: carón, conservador, perfil intelectual baixo, poucos coñecementos, pagado de si mesmo e con certo grado de irresponsabilidade. Pois si. Os resultados desa enquisa, aseméllanse con ese e outros persoeiros en cuestión, aínda que eles posiblemente non saiban que están a mesma altura dun trasnoitado Bosé ou dun tal Trump. Tan só lles faltou os enquisadores preguntar si crían que a Terra era plana e si a viaxe a Lúa fora unha montaxe. Seguro que os negacionistas tamén dirían que si.