Montserrat Santos: «O Azul de Portosín e o berberecho de Noia son dous grandes focos turísticos»

Cebiche de xarda e xouba en salgadura foron dous dos produtos que Montserrat Santos levou ata o Fórum Gastronómico que se celebrou hai pouco en Barcelona para, da man da Deputación da Coruña, amosar en Cataluña as exquisiteces culinarias da provincia. A cociñeira da Casa do Tella de Portosín foi unha das representantes do xeodestino da Ría de Muros-Noia. Xunto cos seus compañeiros, deixou claro que a gastronomía xoga un papel fundamental na estratexia para atraer visitantes.

-Semella que a relación entre gastronomía e turismo está confirmada.

-Está claro que a gastronomía forma parte da cultura dun territorio e constitúe un dos mellores alicientes para atraer visitantes. A xente elixe un territorio polas praias e polas paisaxes, pero tamén polo que pode comer.

-Como se vende fóra o xeodestino Ría de Muros-Noia?

-Estamos apostando pola marca Azul de Portosín e tamén polo berberecho de Noia. Son produtos de moitísima calidade que podes manipular para modernizar a cociña, pero sen restarlle sabor, partindo sempre do tradicional, do máis puro.

-Cales son baixo o seu punto de vista os reis da zona a nivel gastronómico?

-Os bivalvos da ría de Muros-Noia son todos bos, ao igual ca o peixe do cerco, que é capturado de xeito artesanal. O que se consegue con isto é que chegue practicamente vivo aos restaurantes. Estamos a falar fundamentalmente da sardiña, do xurelo e da xarda.

-Que debe pesar máis á hora de cociñar estes produtos, a tradición ou a innovación?

-Nunca te podes esquecer da tradición, pero partindo desa base hai que maridar con xeito, buscando sempre enxalzar o sabor dun produto e nunca disfrazalo. Logo, a innovación pode empregarse en moitos eidos, por exemplo nós recorremos a ela para conseguir que os nenos coman peixe.

-Cal é o segredo dunha boa cociña?

-O segredo consiste en tratar o produto como o que é, sen disfrazalo. Ningún peixe ten a mesma carne nin a mesa textura. A sardiña é para min o máis delicado, hai que manipulalo con moito coidado para non estragalo. A xarda e o xurelo, por contra, son máis fáciles de traballar porque teñen a carne consistente.

-Que buscan os turistas que veñen a esta zona?

-Tanto os turistas como a xente da zona buscan o mesmo, os produtos de aquí pero preparados de forma distinta. Eu fago un filete de sardiña afumada que ten moito éxito, pero é un bocadiño para degustar.

-Pensa que está suficientemente explotada a gastronomía como recurso turístico?

-Penso que hai que apostar pola calidade do produto que temos aquí e explotala. Falta promoción e ese é un eido no que hai moito que traballar, pero non só o sector hostaleiro, senón que teñen que implicarse as Administracións e tamén as confrarías. O produto de quilómetro cero dálle ao destino una identidade propia e diferente.

-No caso do xeodestino Ría de Muros-Noia, cales son os grandes atractivos turísticos a nivel gastronómico?

-Aínda que hai outros produtos a explotar, como o mexillón de Muros, o Azul de Portosín e o berberecho de Noia son dous grandes focos turísticos. Trátase de dúas marcas recoñecidas porque son alimentos dunha calidade superior, non só por eles mesmos, senón pola forma na que se capturan e as boas condicións nas que chegan ás cociñas. Iso inflúe directamente no prato final, non é o mesmo manipular unha sardiña esmagada ca unha que chega intacta.

-Como pode a gastronomía influír no turismo?

-Pode axudar a romper coa temporalidade, pois xa sabemos que aquí, nos meses de verán non hai falla de turistas. A gastronomía ten potencial para converterse nun referente turístico.

-Que receita recomendaría?

-O meu prato estrela, que é o cebiche de xarda, e a miña aposta de cada Nadal para a casa: unha empanada de berberecho de Noia, para min é unha exquisitez como hai poucas.

---

---

---