«Ramón Sampedro estaría contento, España débelle a lei da eutanasia»

Aplauden a aprobación definitiva, aínda recoñecendo que o proceso é moi complexo


Ribeira / La Voz

Na década dos 90, desde unha pequena aldea de Porto do Son, Ramón Sampedro alzaba a voz para esixir o seu dereito a morrer dignamente. Facía 25 anos que sufrira un accidente ao tirarse de cabeza á auga desde unha pedra das Furnas, fracturándose a sétima vértebra cervical e quedando tetrapléxico. El emprendeu unha loita que, trala súa morte, en xaneiro de 1998, continuaron varios amigos, entre os que se atopan Pepe Vila e Xosé Lois Vilar. Para eles, hoxe é un día de festa, porque por fin verán compensado o esforzo coa aprobación, por parte do Congreso, da lei que regulará a eutanasia.

«É unha meta alcanzada, por fin vemos que a loita de Ramón Sampedro deu os seus froitos». Son as palabras de Pepe Vila, quen desde hai máis de dúas décadas ven liderando a homenaxe que cada mes de xaneiro se lle rende nas Furnas ao sonense que ata chegou á Comisión Europea para esixir o seu dereito a morrer. Aínda así, é consciente de que a aprobación da lei non supón o final da batalla. Xosé Lois Vilar fai fincapé nos obstáculos que terá que superar aquel que desexe recorrer á eutanasia: «É unha lei moi garantista, que non facilita o desenvolvemento da vontade cando un quere dar o paso. Require da consulta de ata tres médicos que teñen que emitir ou confirmar un informe que despois é enviado a unha comisión, o que supón un proceso de días».

En contraposición, eles poñen como exemplo o caso de Bélxica, explicando que alí os cidadáns teñen dereito a morrer dignamente e é despois de practicar a eutanasia cando unha comisión fai unha avaliación do proceso: «Levan desde o 2002 coa lei aprobada e só hai un caso que chegou aos tribunais», puntualiza Vilar.

Non dubidan polo tanto ao afirmar que a loita que un día emprendeu Ramón Sampedro debe continuar: «Vaia por diante que estamos satisfeitos, porque esta lei é un paso necesario e imprescindible, pero cando unha persoa está nunha situación terminal precisa que o proceso sexa áxil, sobre todo se non conta co apoio do seu entorno».

Indignados coas mentiras

Eles, que acompañaron no camiño a Ramón Sampedro, que acabou optando polo suicidio, e que lle deron despois continuidade á súa batalla, axudando incluso a algúns veciños a percorrer o final do seu camiño, amósanse indignados diante dalgúns argumentos empregados contra a lei da eutanasia: «Entendo que haxa persoas que non estean de acordo, pero non podo admitir as mentiras. Esta lei non vai facilitar ningún tipo de suicidio clandestino, porque se un a le xa se dá conta de que é tan garantista que sería imposible», afirma con rotundidade Vilar. Tanto el como Pepe Vila fan fincapé, para que a xente o teña en conta, que aqueles pacientes que non teñan capacidade para decidir só poderán acceder á eutanasia se previamente se decantaron por esta opción nun documento de instrucións previas.

A aprobación deste testamento vital foi un dos grandes logros que o movemento Dereito a Morrer Dignamente, do que estes sonenses forman parte, conseguiu ao longo desta dura e intensa loita: «Na época de Ramón Sampedro nin sequera existía esa posibilidade. Logo chegaría tamén a lei dos coidados paliativos. Foi un proceso moi lento, pero cada vez viamos que estabamos máis preto de chegar á meta», sinala Pepe Vila. O seu compañeiro de batalla lamenta que para acadar o obxectivo final «houbera persoas que tiveran que padecer situacións dramáticas».

Conscientes de que foron moitos os que ao longo destes anos se sumaron á causa, eles teñen claro que foi o seu amigo o que puxo o debate enriba da mesa, o que xerou o gran interrogante social. Por iso deducen cal sería a súa reacción nun día coma hoxe: «Ramón Sampedro estaría contento, España débelle a lei da eutanasia» Así de claro o ten Pepe Vila. A opinión é compartida por Xosé Lois Vilar, aínda que el engade que para el tamén sería un triunfo a medias: «El dicía que vivir é un dereito, non unha obriga. Xa daquela, expoñía a necesidade de ir máis alá, de estender a todos a posibilidade de elixir o momento do fin».

El Congreso aprobará hoy la ley que permitirá la muerte asistida en España

javier becerra

PP y Vox anuncian que la recurrirán ante el Tribunal Constitucional

Aprobación por mayoría absoluta en el Congreso y entrada en vigor tres meses después de la publicación en el Boletín Oficial del Estado (BOE) apara la ley de la eutanasia. Si el guion previsto por el Gobierno se cumple, en junio ya podrán solicitar la muerte asistida en España aquellas personas con enfermedades graves e incurables o que sufran padecimientos graves, crónicos e imposibilitantes. Esta prestación la ofrecerá el Sistema Nacional de Salud, teniendo el paciente que confirmar su voluntad de morir al menos en cuatro ocasiones a lo largo del proceso. Este será controlado por una comisión de garantías y la persona que lo solicite podrá echarse atrás en cualquier momento.

Seguir leyendo

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

«Ramón Sampedro estaría contento, España débelle a lei da eutanasia»