Adrián Mosquera: «Se vou a Tokio decidirase por décimas»

O deportista do Rías Baixas tivo que marchar a Sevilla para poder preparar a tempada


Ribeira / la voz

Se algo ten Adrián Mosquera (Rianxo, 1996) é confianza en si mesmo. Non fai falla máis que falar uns segundos con el para velo. Campión de España e padexeiro internacional, o deportista do J. J. Chicolino viaxou a Sevilla para poder adestrar e preparar a campaña do 2021. As borrascas e temporais que levan meses golpeando Galicia obrigárono a cambiar Boiro pola cálida cidade andaluza. Dende alí prepara o seu asalto á Copa do Mundo, proba na que tratará de conseguir un oco nos Xogos Paralímpicos de Tokio. Esa é a súa gran meta deste ano.

-Escapaches de Boiro.

-Home, non quedou outra [ri]. Ca chuvia que caeu levaba dúas semanas facendo só remoergómetro. Veunos ben o cambio a min e ao adestrador [Luis Ourille]. Temos boas sensacións.

-Canto tempo levades polo sur xa?

-Dende o día 14. Estaremos aquí ata final de mes, e logo xa arrancamos de volta para Galicia.

-Viaxe en furgoneta?

-Si, si, porque tamén tivemos que levar os barcos. Baixamos Ourille máis eu para aproveitar o tempo e facer quilómetros en río.

-É necesario.

-Completamente, e aquí as condicións son inmellorables. En Sevilla ata marzo aguántase moi ben a calor. O río está perfecto. Aínda que non vaias moi alá, fas moitos quilómetros. É outro ritmo completamente distinto. De cara á clasificación ao preolímpico é clave. En Boiro non puidemos traballar como nos gustaría e tampouco podes remar só no ximnasio, porque petas. E para o gasto de ir a Verducido continuamente é mellor vir a Sevilla, concentrarte e poder saír a adestrar todos os días.

-Están na residencia do centro de alto rendemento?

-Si, si, volveu a abrir. Da outra vez que viñemos tivemos que meternos nun hotel, pero agora remataron as reformas e ademais temos o río a un paso.

-Cando ven o gordo do ano?

-O que vén sendo o preolímpico é do 12 ao 16 de maio en Hungría. Corresponde coa Copa do Mundo e alí xogámonos as prazas para Tokio. Un par de semanas despois está a Copa de España, que é selectiva para o Campionato de Europa, que se celebrará tres semanas despois. Logo o calendario cae ata Tokio. Adiantáronse todas as competicións ao haber Xogos Olímpicos.

-Vese en Xapón?

-Hai catro prazas dispoñibles e unha xa é para Xapón. De España só pode ir un, pero é complicado. Vamos a ver como están os nosos rivais. Non quero apostar nada, sei que o meu rival de España, Javi Reja, está adestrando ben. Xa estivo en Río de Janeiro. As prazas do kaiak están ocupadas e tócanos participar na proba de canoa V. Nesta categoría xa teño competido e dende agosto do ano pasado é o que estou facendo. Teño posibilidades e para iso estou adestrando. Vou mellor do esperado. Pero vamos, teño que ganarlle a el e aos dos demais países. A cousa está reñida.

-E para a Copa do Mundo xa ten a súa praza asegurada?

-Si, como xa fun o ano pasado e rematei cuarto, xa me clasifiquei automaticamente.

-Iso dálle máis marxe.

-Si, permíteme preparar todo doutra maneira. Pensando só en Hungría e en clasificarme para Tokio. Teño en marzo os 5.000 metros de Sevilla, pero é máis ben un adestramento.

-Na Copa son só 200 metros para decidir se vai a uns Xogos ou ten que esperar catro anos.

-Hai que apertar. Aí é todo ou nada. Como falles na saída xa é imposible rectificar. En 1.000 ou 5.000 metros xa hai máis estratexia, pero nestas distancias tan curtas hai que ir a full dende o principio.

-Canto adoita durar?

-No meu caso, nesta categoría para ser competitivo tes que andar nos 49 ou 50 segundos. Se estás nese tempo estás no meollo. Xa che digo, se vou a Tokio decidirase por décimas. Vai depender da saída, do vento, como estea a calle, pero ao final todo depende coma chegues ti.

-A últimas vez que falamos estaba preparando oposicións. Anda metido en algo ou este ano é só para adestrar?

-Non as aprobei por pouco. Estiven cerca, pero había que intentalo. Foi a primeira vez e agora nada, rematei o ciclo de Administración e Finanzas e agora estou rematando outro de Asistencia á Dirección en Santiago.

-Bueno, tocaríalle estudar dende a casa, non?

-No meu caso hai que ir alá. Tivemos a clase confinada uns 15 días, pero non hai queixa. Non volvemos a ter problemas. Quédanos dúas semanas de clase e en xuño tocaría as prácticas. Eu teño que pospoñelas polas competicións. Ademais, se o tempo en Galicia non acompaña, teremos que volver outra vez a Sevilla e darlle a piñón.

O reto. O rianxeiro prepara en Sevilla a Copa do Mundo, que será en Hungría a mediados de maio.

A proba. A súa disciplina é a de 200 metros sprint.

Formación. Está estudando o seu segundo ciclo no eido da administración empresarial.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Adrián Mosquera: «Se vou a Tokio decidirase por décimas»