Profesionais do mar emprenderon un proxecto para dar a coñecer o produto co que traballan: subir ás redes sociais receitas elaboradas con eles
17 ene 2021 . Actualizado a las 05:00 h.O marisqueo é un dos oficios máis tradicionais que se coñecen e mantense vixente adaptándose aos novos tempos. Agora súmase á onda da era dixital e tamén está presente nas redes sociais. A Asociación Mulleres do Mar de Arousa atopou nestas ferramentas un espazo para dar visibilidade ao seu traballo e aos produtos marisqueiros que enchen as praias da ría. A situación actual derivada do coronavirus impediu que a organización desenvolvera proxectos para impulsar o labor das mulleres neste sector, polo que optaron por dar a coñecer a materia prima subindo receitas ao seu Facebook nas que os mexillóns, as ameixas, as centolas, os percebes ou os berberechos son protagonistas.
A través desta iniciativa, as profesionais levan directamente o produto das praias ao mantel. «Trasladamos o mar á mesa. Nós cociñamos e preparamos o marisco que collemos nos bancos», explica Bea Olveira, asociada e presidenta da agrupación de mariscadoras de A Pobra. Ela sumouse ao proxecto coa preparación de centolas. «Limpámoslles as algas, cocémolas en auga do mar, a ser posible, e 15 minutos despois de que ferva estarían xa listas para degustar», conta.
Aposta polo mexillón
O mexillón estivo moi presente na iniciativa. A presidenta da Asociación Mulleres do Mar de Arousa, a rianxeira Dolores Gómez, é bateeira e apostou por elaboralo con cachelos: «Gústanme moito. Frites un allo, douras as patacas, déixalas cocer e botas o molusco. Sabe moi ben e é fácil de preparar», apunta. Celia Herbón comparte oficio con Gómez, aínda que ela traballa en Cespón. Para elaborar a receita elixiu o mesmo produto, pero cociñado á feira.
«Na miña casa está sempre moi presente. Todo o mundo sabe facelos ao vapor, por iso quixen cambiar», sinala Herbón. Neste caso, unha vez que estean os mexillóns cocidos hai que sacalos da concha, poñelos nun prato de madeira e engadirlles aceite e pimentón doce e picante ao gusto. A bateeira precisa que hai «mil e unha formas» de elaborar este bivalvo e enxalza as súas propiedades alimenticias.
O percebe tampouco faltou á cita e Concha Ramallo, percebeira da confraría de Aguiño e vicepresidenta da asociación, explicou como sacar o maior partido a este crustáceo que ten tantos adeptos: «Son a miña especialidade e mostro a miña maneira de comelos, que é ao natural. Non precisan moito, só cocelos en auga de mar e botarlles loureiro. Cando ferva engadímoslle os percebes, esperamos un minuto despois de que volvan ferver e xa estarían listos para comer».