Barbantia dálle a benvida ao novo ano co escritor rianxeiro Xosé Luís Axeitos

O 29 presentarase «Aproximacións a Manoel Antonio», con dous textos inéditos do bardo


Xosé Luís Axeitos é o escritor elixido por Barbantia para estrear o 2020. A asociación realizará o vindeiro día 29 o primeiro acto deste novo ano en Rianxo (auditorio, 19.00 horas), onde o convidado de honra presentará o seu último libro, Aproximacións a Manoel Antonio. Trátase dun volume de ensaios sobre o poeta, no que se inclúen dous textos inéditos.

O autor estará arroupado por María Xesús Blanco, vicepresidenta de Barbantia; Roberto Abuín, de Axóuxere Editora, e Adolfo Muíños, rexedor local. O acto coincidirá coa saída á luz dun novo número, o 161, de A voz de Barbantia, o suplemento cultural publicado mensualmente pola asociación.

Como en ocasións anteriores, aínda que a literatura será a protagonista, Barbantia tamén poñerá en escena outros xéneros artísticos. Tanto a apertura coma o peche do acto serán musicais e correrán a cargo de Miriam Pardal Figueiro (trompa) e Félix Iago Rodríguez Ramos (bombardino), ámbolos dous alumnos da Escola de Música de Rianxo. Ademais, mentres Axeitos fala do proceso de elaboración do libro, Xosé Luís Veiras Manteiga levará a cabo unha intervención plástica.

Aínda que se trata da convocatoria mensual de Barbanza, esta presentación enmárcase no programa de actividades organizado polo Concello de Rianxo para renderlle homenaxe a Castelao, coincidindo co aniversario do seu nacemento.

Axenda anual

Pendentes dos actos que permitirá levar a cabo o covid neste complicado ano, os directivos de Barbanza reuniranse o mesmo día 29 en asemblea xeral para analizar, entre outras cuestións, a axenda de actividades deste 2020. Entre as citas a incluír atópanse as presentacións de libros como Vida e traballo no mar dos galegos, de Francisco Calo Lourido; Celada, de Antonio Piñeiro; Donos de seu, de José Manuel Vázquez Lijó; e Unha tirada de dados, de Manuel Cartea.

A entidade tamén ten previsto levar a cabo en Boiro un encontro de poesía e música e promover unha xuntanza de artistas en Noia. E convocará os Premios Barbantia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Barbantia dálle a benvida ao novo ano co escritor rianxeiro Xosé Luís Axeitos