Agustín Agra abandona cinco anos de silencio con «Silencio»

O autor, que foi presentado por Chus Blanco en nome da Asociación Barbantia, fixo un percorrido pola súa traxectoria literaria, así como pola de Antonio Piñeiro


RIBEIRA / LA VOZ

Moito silencio na presentación do último libro de Agustín Agra. Primeiro, porque rachaba cinco anos de silencio. Segundo, polo que inflúen no silencio as máscaras obrigatorias en actos nos que a comunicación é clave. Terceiro, polo titulo do libro, Silencio. E cuarto, polo tema co que Pablo Sax deu por finiquitado o acto, a peza 4’33’’ que fixo famosa o pianista John Cage en 1952 e que consiste en non tocar o instrumento nese espazo de tempo, sendo os ruídos que se perciben a obra en si, e a mensaxe de que, realmente, o silencio non existe 

Pero Silencio de Agustín Agra existe, é tanxible, un traballo que, segundo Antonio Piñeiro, é digno de felicitar ata a fartura, como fixo o profesor, escritor e editor barbancés á hora de referirse ao autor e á súa obra. Piñeiro gabou especialmente que Agra conseguira fuxir do habitual: «É unha novela diferente, magnífica, non é convencional, mantén o pulo e a tensión». Piñeiro foi moi crítico coa arte actual: «Caeu en banalidades. O mesmo pasa coa literatura, con iso que chaman best seller, que teñen lugares comúns, tópicos e tramas que sabemos de antemán por onde van ir».

O profesor asegurou que no seu novo libro Agustín Agra fuxe de todo iso que vén encher un baleiro: «Trátase dun conxunto de relatos que parecen separados, pero non o están».

O autor, que foi presentado por Chus Blanco en nome da Asociación Barbantia, fixo un percorrido pola súa traxectoria literaria, así como pola de Piñeiro. Sinalou, coma orixe do seu traballo, a súa admiración por Alexander von Humboldt, do que rebelou que foi o primeiro en falar do cambio climático, e precisamente este novo libro quixo ser unha novela sobre o propio Humboldt, de quen dixo que escribiu ata o último día da súa vida. En canto a Silencio, explicou que ten moitos niveis de lectura, pero, dada a condición de biólogo do propio autor, repartiuna como un corpo animal: esqueleto, músculos e vísceras.  

Libre pensamento

Porén, Agra detallou que Silencio non é un libro de ciencia nin de filosofía, e reivindica o papel do libre pensamento e a propia muller no mundo da ciencia: «Intentei contarme o mundo a min mesmo e tiven moi presente ao meu alumnado», engadiu antes de dar pé a unha listaxe de agradecementos.

Pechou o acto mensual da Asociación Cultural Barbantia o alcalde de Noia, Santiago Freire, que pediu a Agustín Agra que non espere outros cinco anos a sacar unha nova obra, convidou aos presentes a ler Silencio e agradeceu que cumpriran as normas de seguridade sanitaria.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Agustín Agra abandona cinco anos de silencio con «Silencio»